“Бірлік пен келісім жолындағы 30 жыл” ескерткіш тақтасы ашылды

Ұлтаралық келісім — республикамыздағы мемлекеттік саясаттың басым бағыттарының бірі. Осылай деген қала тұрғындары мен түрлі этнос өкілдері “Достық үйі” ғимаратының алдында бас қосты.

Салтанатты жиында Атырау облысының әкімі Серік Шәпкенов сөз сөйледі.

— Бүгін көктемнің алғашқы жайма-шуақ күнімен тұспа-тұс келген Қазақстан халқы Ассамблеясының құрылған күнімен және Алғыс айту күнімен баршаңызды шын жүректен құттықтаймын. Көктем мезгілі жер дүние жаңарып, жаңашылдыққа бастайтын кез. Барлық өкпе-ренішті ұмытып, жақындармен жайдары күймен қауышатын, көңілге шабыт сыйлайтын ерекше кез. Сондай-ақ күллі мұсылманның асыға күтетін қасиетті Рамазан айы да басталды. Қазақстан халқы Ассамблеясы – еліміздің бейбітшілік пен тұрақтылық жолындағы маңызды институттарының бірі. Осы 30 жыл ішінде Ассамблея этностар арасындағы татулықты сақтау мен нығайтуда үлкен рөл атқарды. Осы сәтте Ассамблея өкілдеріне зор алғысымды білдіргім келеді. Тағы бір айта кететін жайт, Мемлекет басшысы Қасым-Жомарт Тоқаевтың Жарлығымен 2025 жыл Жұмысшы мамандықтарының жылы деп жарияланды. Еліміздің экономикасының дамуына өлшеусіз үлес қосып, әр салада елеулі еңбек етіп жүрген жұмысшыларға алғысымды айтамын. Баршамыз әрқашан бір-бірімізге ризашылығымызды, алғысымызды жаудырып, татулық пен бірлікті ту қып ұстасақ еліміздің ертеңі де жарқын болмақ,-деді С.Шәпкенов.

Келесі сөз алған “Вайнах”-шешен-ингуш Қазақстан халқы Ассамблеясы этномәдени бірлестігінің құрметті ардагері, Атырау облысы ҚХА ақсақалдар кеңесінің мүшесі Зелимхан Зубариев ел ішіндегі тұрақтылық пен татулықтың сақталуы – әрбір Қазақстан азаматының міндеті екенін жеткізді. Оның айтуынша, Ассамблея өзінің миссиясын жалғастыра отырып, елдегі бірлікті одан әрі нығайтуға үлес қоса бермек.

Содан соң “Бірлік пен келісім жолындағы 30 жыл” ескерткіш тақтасының ресми ашылуы өтті. Ескерткіш тақтаны ашу құрметі Атырау қалалық Ақсақалдар кеңесінің төрағасы Кеңес Қосыбаев пен “Иверия” грузин этнтмәдени бірлестігінің төрағасы Зураб Гедевановичке берілді.

Еркеназ ҚАЛИЖАН
Суреттерді түсірген Ерлан АЛТЫБАЕВ