BINOMNEWS медиа академиясының оқушылары республикалық байқауда топ жарды

Атырау қаласындағы BINOMNEWS медиа академиясының оқушылары алғашқы рет қатысқан республикалық деңгейдегі байқауда топ жарды.

КТК компаниясының демеушілігімен ұйымдастырылған «Жас толқын» республикалық балалар байқауында медиа академия шәкірті Айша Серік бас жүлдені жеңіп алса, Нұрай Сағатжанова мен Ясмин Алматқызы І орынды иеленді.

Аталған жобаға медиа академияның өкілдері Гүлназ Кәрімжан мен Айнагүл Қалбаева жетекшілік етті. Олар байқауға оқушыларымен бірлесіп «Әлеуметтік видео» бағыты бойынша креативті жоба дайындап, қазылар алқасының жоғары бағасына ие болған.

– Бұл – біздің алғашқы байқауымыз әрі алғашқы үлкен жеңісіміз. Еңбектің наны тәтті екеніне тағы бір көз жетті. Қуанышымызда шек жоқ, – дейді медиаакадемия өкілдері.

Айта кету керек, «Жас толқын» байқауының алғашқы кезеңіне еліміздің түкпір-түкпірінен 1000-ға жуық бала қатысса, екінші кезеңге 350 үміткер өткен. Олардың арасынан суырылып шыққан BINOMNEWS медиа академиясының шәкірттерінің жетістігі – тың жобалармен шұғылданып жүрген жас медиа буынның әлеуетінің жоғары екенін айқындай түсті.

Алтыншаш ҚҰРМАШЕВА