Бес айда өнеркәсіп өнімінің көлемі 3,2 трлн. теңгені құрады. Бұл туралы Атырау облысының әкімі Махамбет Досмұхамбетов Орталық коммуникациялар қызметінде өтіп жатқан брифингте айтты, деп хабарлайды Атырау облысының өңірлік коммуникациялар қызметі.
– Республика өнеркәсібіндегі Атыраудың үлесі 22,7%-ды құрайды. Өңірде 19,5 млн. тонна мұнай мен 10,2 млрд. текше метр ілеспе мұнай газы өндіріліп отыр. Өңдеу өнеркәсібінің көлемі 244,5 млрд. теңгені құрады. «АМӨЗ» ЖШС-і 2 095,9 мың тонна мұнай өнімдері өңделді, – деді спикер.
Сондай-ақ, биыл Кәсіпкерлікті қолдау картасы шеңберінде 837 млрд. теңге болатын бес жобаны жүзеге асырып, 560 жұмыс орнын ашу жоспарлануда. Жыл басынан бері негізгі капиталға салынған инвестициялар 1 трлн. 15 млрд. теңгені құрады.
Еске сала кетелік, бүгін Атырау облысының әкімі Махамбет Досмұхамбетов Нұр-Сұлтан қаласында Мемлекет басшысының тапсырмалары аясында Атырау облысының әлеуметтік-экономикалық дамуы туралы брифинг берді.