БЕКЕТ АТАНЫ әлем таниды
CАФИ ӨТЕБАЕВ АТЫНДАҒЫ АТЫРАУ МҰНАЙ- ГАЗ УНИВЕРСИТЕТІНДЕ ӘУЛИЕ БЕКЕТ МЫРЗАҒҰЛҰЛЫНЫҢ ҰРПАҒЫ ИСЛАМ МЫРЗАБЕКҰЛЫНЫҢ «БЕКЕТ АТА» КІТАБЫНЫҢ АҒЫЛШЫН ТІЛІНДЕГІ НҰСҚАСЫНЫҢ ТАНЫСТЫРЫЛЫМЫ ӨТТІ. ЕЛГЕ МҰРАСЫ, ҰРПАҚҚА ҰЛАҒАТЫ ҚАЛҒАН БЕКЕТ МЫРЗАҒҰЛҰЛЫНА АРНАЛҒАН КІТАПТЫҢ ТАНЫСТЫРЫЛЫМЫНА БЕЛГІЛІ АЗАМАТТАР ШАҚЫРЫЛҒАН.
Кітаптың ағылшын тіліндегі нұсқасын осы университетте еңбек етіп жатқан «Болашақ» бағдарламасының түлектері дайындаған. Олардың еңбектерін Ұлыбритания елінің редакторлары сараптан өткізіпті.
Халқымыз ата- бабамыздың жүріп өткен жолына құрметпен қараған. Ислам Мырзабекұлы құрастырған кітап 2019 жылы 743 бет болып шыққан еді. Жарты жыл бұрын қолға алынған кітаптың төртінші басылымы бүгінгі таңда әлемдегі ең көп таралған ғылым мен білімнің тілінде жарық көріп отыр.
– Бекет атаның көзі тірісінде салып кеткен төрт мешіті бар. Оның бірі – Ақмешіт, қалған үшеуі – Маңғыстауда. Әулие ата өзінің тұлғалық қасиеті, адамгершілік қасиетімен еліне жаққан, – деп, Ислам Мырзабекұлы Бекет атаның кісілік келбеті жөнінде әңгіме өрбітті.
Кітаптың ағылшын тіліндегі нұсқасының жарық көруіне атсалысқан Сафи Өтебаев атындағы Атырау мұнай-газ университетінің Басқарма төрағасы-ректоры Гүлзада Шакуликова, универ- ситет қызметкерлері Дархан Құралхан, Қанат Оразалиев, Құралай Әлібек, Мәлика Серікбаева, Динара Рысбекова, Дамир Маштахов, Айна Тазабекова, Гүлзада Ибраева, Рүстем Акимовтардың еңбегін атап өту керек.
Кітап бұған дейін журналист Гүлжан Елешованың аудармасымен орыс тілінде жарық көрген болатын.
– Университет басшы- лығының бастамасымен аты аңызға айналған «Бекет ата» кітабын ағылшын тіліне аударуға демеушілік жасаған «Анега Қазақстан» компаниясы. Бұқарада оқып, білім жинаған соң өз өңіріне қайта келіп, мешіт салдырған Бекет ата Мырзағұлұлы туралы толық мәлімет беретін кітапты ағылшын тілінде басып шығару туралы ойымызға қолдау көрсеткен барлық тілеулес азаматтарға шынайы алғысымызды айтамыз, – деді университеттің жастар саясаты және әлеуметтік мәселелер жөніндегі проректоры Қанат Оразалиев.
Атырау облыстық қоғамдық кеңестің төрағасы Максим Ізбасов пен кітаптың авторы Ислам Мырзабекұлы ағылшын нұсқасындағы кітаптың тұсауын кесіп, оқырманы көп болуына тілектестігін білдірді.
– Шараның тәрбиелік тағылымы мол деп білемін. Бекет атамызды тек қазақ қана білмей, өзгелер де біліп жатса артық емес. Университет ұжымы тек мұнай-газ өнеркәсібінің мамандарын дайындап қоймай, рухани байлық бағытында тәрбие беріп жатыр. Сол үшін ұжымға өз атымнан алғыс білдіргім келеді. Бекет атаны ағылшын тілінде сөйлетіп, шетелден келіп жатқан адамдарға қазақ деген халықтың кім екенін таныту үлкен іс деп білемін, – деді Максим Шафихұлы.
Салтанатта асыл тұлғаға арналған өлеңдер мен жырлар оқылып, көрермендерге ерекше әсер сыйлады.
Алмас БАУЫРЖАНТЕГІ
