Бақытты ел – бақытты отбасы

Атырау облысы полиция департаментінің Отбасылық-тұрмыстық зорлық-зомбылыққа қарсы күрес жөніндегі бөлімі «Бақытты отбасы – бақытты ел» республикалық акциясы аясында Ішкі істер органдарының ардагерлерімен кездесу өткізді.

Жиынның негізгі мақсаты ардагерлердің өмірлік тәжірибесін жас қызметкерлерге жеткізу, отбасы құндылықтарын дәріптеу және тұрмыстық зорлық-зомбылықтың алдын алуға бағытталған пікір алмасу болды.
Кездесу барысында ардагерлер қызмет жолындағы естеліктерімен бөлісіп қана қоймай, отбасы татулығын сақтаудың мән-маңызына тоқталды. Олар ажырасуға жол бермеу, ер мен әйелдің өзара сыйластығы, бала тәрбиесіне жауапкершілікпен қарау сынды тақырыптарда ақыл-кеңестерін айтып, жас буынға өнегелік бағыт-бағдар көрсетті.
– Отбасы қоғамның берік іргетасы. Әрбір шаңырақта сыйластық пен түсіністік салтанат құрса ғана елдің іргесі мығым болады. Сол үшін әркім ең алдымен өз үйінде татулық пен мейірімділікті сақтай білуі керек, — деді полковник Раиса Айтжанова.
Сонымен бірге, Отбасылық-тұрмыстық зорлық-зомбылыққа қарсы күрес жөніндегі бөлім инспекторлары тұрмыстық зорлық-зомбылықтың алдын алу бағытында түсіндірме жұмыстарын жүргізіп, отбасыдағы сыйластық пен татулықтың маңызын тағы бір мәрте атап өтті.
Бұл бастама – қоғамда отбасылық құндылықтарды нығайтып, келешек ұрпаққа өнегелі тәрбие беру жолындағы маңызды қадамдардың бірі.

Майра ЕРҒАЛИ