Балаларға арналған ертеңгіліктер басталды

Атырау қаласындағы «Достық» үйінде«Татулық» татар-башқұрт этномәдени бірлестігі«Жастар қанатының» ұйымдастыруымен жаңажылдық ертеңгілік өтті. Мерекелік кешке М.Ломоносов атындағы мектептің оқушыларыбелсене қатысты. «Біз жаңа жылды тойлаймыз!» тақырыбында арнайы дайындалған қойылым көрсетіп, жиналғандарға мерекелік көңіл-күй сыйлады. 

«Қуанса, бала қуансын», «Берсең, балаға бер» демекші, баллалардың бақытты балалық шағына ерекше ден қою мақсатында ұйымдастырылған жаңажылдық іс-шараның ұйымдастырушыларының бастауында аталған этномәдени бірлестіктің тәлімгер-ұстаздары Земфира Романова, Рафида Тултаеваның орны зор. 

Сондай-ақ «Жастар қанатының» белсенді мүшелері Алина Валиева, Линар Мубаракшаев, Иралия Кузиева, Руфия Сабирова белсенділік танытып, балаларға қыс мезгілі тақырыбында түрлі ойындар ұйымдастырды. Балалардың ойлау қабілетін жаттықтыру мақсатында бірнеше жұмбақ жасырып, олардың көңілін бір серпілтіп тастады.

Оқушылар да өз өнерлерін көрсетіп, Аяз ата мен Ақшақардан жаңажылдық сыйлықтар алды. Ертегі әлеміне енген кейіпкерлерімен бірге ән салып, би билеп, естелік суретке түсті. Жаңажылдық ертеңгілікте 40-қа жуық бала қамтылды.

Алтыншаш НӘСІПҚАЛИҚЫЗЫ

Суретті түсірген автор