Азаматтық жауапкершілік пен еркіндіктің бастауы
Биыл Қазақстан Республикасының Конституциясы қабылданғанына 30 жыл толып отыр. Осы тарихи әрі маңызы зор дата аясында С.Өтебаев атындағы Атырау мұнай және газ университетінде «Ата Заң – азаматтық жауапкершілік пен еркіндіктің бастауы» тақырыбында “дөңгелек үстел” ұйымдастырылды.
Іс-шараның мақсаты – студент жастардың құқықтық мәдениетін арттыру, Конституцияның қоғамдағы рөлін терең түсіндіру және әрбір азаматтың құқықтық сауаттылығын нығайту.
Басқосуға университет басшылығы, профессор-оқытушылар құрамы, студенттер мен магистранттар қатысты.
Іс-шараның модераторы, доцент Болат Нығметов: «Конституция – мемлекеттің тірегі ғана емес, әрбір азаматтың өмір сүру ережесін айқындайтын басты құжат. Оның әрбір бабы – тәуелсіздігіміздің негізі мен қоғам тұрақтылығының кепілі», – деп атап өтті.
“Дөңгелек үстелде” Алмагүл Құбашева «Қазақстан Республикасы Конституциясының жастардың цифрлық азаматтық жауапкершілігін қалыптастырудағы рөлі» баяндамасында интернет пен цифрлық ортада құқықтық мәдениет пен жауапкершілікті арттырудың маңызын атап өтті. Толғанай Мырзакелді «Цифрлық Қазақстан және жасанды интеллекттің конституциялық құндылықтарды нығайтудағы рөлі» атты баяндамасында заманауи технологиялардың адам құқықтарын қорғау мен демократиялық құндылықтарды сақтаудағы әлеуетін сөз етті. Университет студенті Әлкей Шапхатов «Қазақстан Конституциясы және жастардың құқықтары» тақырыбындағы баяндамасында жастардың білім алу, еңбек ету, еркін пікір білдіру сияқты негізгі құқықтарын Ата Заңмен байланыстыра отырып, өз көзқарасын білдірді.
Іс-шара барысында басқа да қатысушылар Конституцияның қалыптасу тарихы, құқықтық мемлекеттің қағидаттары, азаматтардың негізгі құқықтары мен бостандықтары жөнінде ой бөлісті.
