Ауыл шаруашылығы ардагеріне арналған турнир өтті

Қызылқоға ауданының ауыл шаруашылығы саласына елеулі еңбек сіңірген, Қазақстан Республикасының Құрметті депутаты және аудандық мәслихаттың 1-4 шақырылым депутаты Оңғар Жанықұловты еске алу мақсатында волейболдан аудандық турнир ұйымдастырылды. Бұл туралы Қызылқоға ауданы әкімдігінің баспасөз қызметі хабарлады.

Турнирдің ашылу салтанатына аудан әкімі Қанат Әзмұханов қатысып, Оңғар Жанықұловтың Қызылқоға өңірінің өркендеуіне, әсіресе ауыл шаруашылығына қосқан үлесін ерекше атап өтіп, жарысқа қатысушыларға сәттілік тіледі. Аудандық мәслихат депутаты Сайлаубек Темірғалиев те сөз сөйлеп, Оңғар Жанықұловтың аудан тарихында қалдырған ізін құрметпен еске алды.

Жарысқа әр ауылдық округтен келген сегіз команда қатысты. Турнир қорытындысы бойынша Тасшағыл ауылдық округі жеңімпаз атанып, бірінші орынды иеленді. Екінші орынға Сағыз ауылдық округінің командасы, ал үшінші орынға Миялы ауылдық округінің командасы ие болды. Үздік ойыншы атағы Миялы ауылдық округінен қатысқан Бексұлтан Жәнібекұлына бұйырды.

Жеңімпаздарға кубок, медальдар, дипломдар және ақшалай сыйлықтар табысталды.

А.НӘСІПҚАЛИҚЫЗЫ