Audi, Siemens және Bosch жасанды интеллект нарығында көшбасшы болуды көздейді
Еуропалық алыптар Audi, Siemens және Bosch өндірісті трансформациялау үшін жасанды интеллектіні белсенді түрде енгізіп жатыр, — деп хабарлайды DW.
Audi-де ол дәнекерлеу тігістерінің фотосуреттерін нақты уақыт режимінде талдап, ақауларды анықтап, жұмысшыларға оларды жедел түзетуге көмектесіп келеді. Жақын арада робот дәнекерлеу кезінде пайда болатын «шашырандыларды» да автоматты түрде жоя алатын болады, бұл өндіріс жылдамдығы мен сапасын айтарлықтай арттырады.
Siemens техникалық сызбалармен, робот деректерімен және өндірістік желілер туралы мәліметтермен жұмыс істей алатын бірегей өнеркәсіптік базалық жасанды интеллект үлгісін жасап жатыр. Бұл модель барлық ақпаратты бір жүйеге біріктіріп, процестерді жеделдетуге, ақауларды болжауға, логистиканы оңтайландыруға және жаңа өнімдерді тезірек шығаруға мүмкіндік береді. Компания қазірдің өзінде өнеркәсіптік деректермен алмасу үшін клиенттерді тартып, Еуропада жасанды интеллектіні жаппай енгізуге негіз қалап отыр.
Bosch өндірістегі мәселелерді дербес анықтап, тез шешім қабылдайтын автономды жүйелерге басымдық беріп отыр. Мысалы, жабдық бұзылған жағдайда, жасанды интеллект басқа зауыттардың тәжірибесін, нұсқаулықтарды талдап, жедел шешім ұсынады. Бұл технология шығындарды азайтып қана қоймай, сервисті жаңа деңгейге көтереді.
Сонымен бірге, Еуропа АҚШ және Қытаймен қатаң бәсекелестік жағдайында. АҚШ-та OpenAI мен Google сияқты компаниялар ірі тілдік модельдер жасауда үстемдікке ие, Қытай да бұл салада қуат пен инвестиция көлемін арттырып жатыр. Ал Еуропада басты артықшылық – өнеркәсіптегі тәжірибе мен бірегей деректер, деп жазады Spiegel журналы. Сарапшылардың пікірінше, өнеркәсіптегі жасанды интеллектіні үйлестіріп дамыту Еуропаның жаһандық технологиялық жарыстағы басты бәсекелік артықшылығына айналуы мүмкін.
Айта кетелік Мемлекет басшысы жасанды интеллектіні дамыту мәселелері жөнінде кеңес өткізген еді.
kazinform.kz
