Атыраулықтар Наурыз мерекесін айрықша атап өтті (+ФОТОРЕПОРТАЖ)

Admin22.03.2025 13:59

Атырауда Ұлыстың Ұлы күніне арналған
“Қош келдің, Әз Наурыз”театрландырылған
мәдени іс-шара өтті. Ауа райының салқындығына қарамастан Исатай-Махамбет алаңына жиналған жұртшылықтың қарасы көп. Өңір тұрғындары мен қонақтары Ұлыстың ұлы күнін тойлауға келді. Әрбіреуінің жүзінде — қуаныш, көңілінде — шуақты көктем. Бір-бірімен сағыныса қауышып, үлкендерімен көріскен халық Атыраудай айбынды өлкенің сән — салтанатын келтірген думанды мерекеге асықты. “Әлемге тіршілік нәрін сыйлаған құдіретті мейірім мен кешірімнің, жаңа күн мен жаңа жылдың мейрамына басымыз аман, бауырымыз бүтін жеткеніміз қандай ғанибет”, — десті атыраулықтар бір ауыздан.

Мұнайлы өлке тұрғындары мен қонақтарын айтулы мерекемен облыс әкімі Серік Шәпкенов құттықтады.

-Қазақ халқының тағдыр талайымен сабақтасып жатқан Әз Наурыз бүгінде жалпыұлттық мерекеге, нағыз думанға айналды. Бұл мейрамның тынысы тарылып, халқымыздың осындай ғанибеттен қол үзіп қалған кезі де болды. Тізгін өзімізге тигенде Наурызбен қайта қауышып, өшкеніміз жанды. Өн бойы ұлағат, ұлттық бояуы қанық осынау дәстүрімізді ұрпақтан ұрпаққа жеткізу, кең насихаттау, төл жаңа жылымыздың құндылығын жас ұрпаққа сіңіріп, оны өміршең ету — біздің ұлттық мәдениет пен руханият алдындағы борышымыз. Жаңа жылды жақсы ниетпен, пайдалы іспен бастау – талайдан қалыптасқан дәстүр. Ұлыстың ұлы күнінде қонақжай жұртымыз ақ дастарқан жайып, бір-біріне ақжарма тілегін айтады. Бұлақтың көзін ашып, тал егеді, төңіректі тазартады. Биыл Ұлыстың ұлы күні Рамазан айымен тұспа-тұс келіп отыр. Қазақ жеріндегі дін мен дәстүрдің үйлесімі дәл осы кезде айқын көрінеді, – деген еді Мемлекет басшысы Қасым-Жомарт Тоқаев. Әз Наурыз – жаңару пен жасампаз рухтың жаршысы. Тағылымы мол бұл мереке – адам мен табиғат арасындағы үндестіктің, келісім мен татулықтың алтын арқауы. Ұлттық мерекемізді ұлығылау мақсатында облыс аумағында «Наурызнама» мерекелік онкүндігі жоспарланып, түрлі мәдени-көпшілік іс-шара ұйымдастырылды. Дәстүріміз дәріптелген бұл шаралар рухымызды асқақтатып, бірлігімізді нығайтып, Отанымыздың игілігі жолында жаңа жетістіктерге қадам басуға дем бергендей. Қазақ елінің бірлігі мен ынтымағы артып, Тәуелсіздігіміздің тұғыры биік, егемендігі мәңгі баянды болсын! Әр шаңырақтың төріне қуаныш пен молшылық тілеймін! -деді ол.

Аталар аманаты мен өсиетін жадында сақтаған ұрпақтың қашанда бірлігі ажырамай, берекелі күндері көп болсын деген ниетпен сахнада қазақ эстрадасының жұлдыздары «Жігіттер» квартеті өнер көрсетті. Сондай-ақ, бүгін рухты әндерден топтама орындаған “Асау” триосының тұсауы кесілді.
Айтулы мерекеде эстрада жұлдызы Нұрболат Абдуллин атыраулықтарға ерекше көңіл — күй сыйлады. Ол ел арасында кеңінен танымал әндерін орындап, көрермендерді бір серпілтіп тастады.

Орталық алаңдағы мерекелік шара кешкі сағат 18.00-де жалғасын таппақ. Онда Құрманғазы атындағы Мәдениет сарайының өнерпаздары, би топтары, өнер мектептері, мәдениет үйлерінің әншілер және қазақ эстрада әншілері Нұрболат Абдуллин, «Жігіттер» квартеті өнер көрсетпек.