Атырауға келген халықаралық байқаушылар сайлаудың өту деңгейіне қатысты ойларын айтты
ҚР Парламенті Мәжілісі мен мәслихаттар сайлауын Ресейден бес дипломат және ЕҚЫҰ елдерінен екі дипломат бақылады. Олар сайлаудың өту деңгейін жоғары бағалады, деп хабарлайды Атырау облысының коммуникациялар қызметі.
Атырау облыстық аумақтық сайлау комиссиясының хабарлауынша, өңірге ТМД Миссиясы бойынша РФ-ның Астрахан облысынан бес бақылаушы, сондай-ақ Еуропадан екі дипломат келді. Олардың барлығы халықаралық аккредитациядан өтіп, ПТР-тест тапсырды. Шетелдік қонақтардың айтуынша, аймақтағы дауыс беру процесі жоғары деңгейде ұйымдастырылған.
— Мен, ең алдымен, бүгінгі сайлаудың жоғары дәрежеде ұйымдастырылғанын атап өткім келеді. Бірінші кезекте, ол әрине азаматтардың қауіпсіздігіне бағытталған. Барлық учаскелер санитарлық құралдармен жабдықталған: қорғаныс экрандары, санитарлық кілемшелер, қол санитайзерлері, медициналық маскалар. Сондықтан, Атырау облысы тұрғындарының қауіпсіздігі мен денсаулығына алаңдамау керек деп сенемін, — деді ТМД Миссиясы бойынша Ресейден келген халықаралық бақылаушы Владимир Золотокопов.
Айта кетейік, күні бойы халықаралық байқаушылар Атырау қаласындағы, сондай-ақ аудан мен ауылдардың сайлау учаскелерін аралап шықты. Дипломаттар дауыс беру бекеттеріндегі санитарлық қауіпсіздік шараларын бағалап, сайлау процесін бақылап отырды. Сонымен қатар, еліміздегі әріптестерімен де тәжірибе алмасты.
