Атырауда жасөспірім тізгіндеген көлік апатқа ұшырады

Кеше, 19 қаңтар күні сағат 23:30 шамасында Атырау қаласы аумағындағы Атырау-Дамба тас жолында жол-көлік оқиғасы орын алды. 2007 жылы туған жасөспірім тізгіндеген ВАЗ 2170 және 2000 жылы туған жүргізуші басқарған Toyota Camry автокөліктері соқтығысқан.

Облыстық полиция департаменті баспасөз қызметінің хабарлауынша, апат салдарынан ВАЗ 2170 автокөлігінің 2009 жылы туған жолаушысы оқиға орнында қаза болды. Сонымен қатар тағы бір жолаушы мен көлік жүргізушісі ауыр жарақат алып, ауруханаға жеткізілді.

–Қазір тиісті органдар тарапынан кешенді тергеу амалдары жүргізілуде. Жасөспірімдердің көлік жүргізуіне және түнгі уақытта қараусыз жүруіне жол бермеңіздер. Бала қауіпсіздігі – бәрінен маңызды, — делінген баспасөз хабарламасында.

А.НӘСІПҚАЛИҚЫЗЫ

Сурет: freepik.com