Атырауда «WorldSkills Atyrau 2024» чемпионаты басталды
Атырау қаласындағы Абай орталығында «WorldSkills Atyrau 2024» чемпионатының салтанатты ашылуы өтті. Бұл чемпионат — бес күн бойы еліміздің әртүрлі колледждерінен келген талантты студенттер мен жас мамандардың шеберліктерін көрсететін алаң. Олар құрылыс, медицина, энергетика, қызмет көрсету секілді салаларда өз дағдыларын паш етеді.
Іс-шараның ашылу салтанаты барысында өткен жылдардағы жетістіктер мен қатысушылардың табыстары туралы баяндалды. Атырау облысының студенттері жыл сайын жоғары нәтижелер көрсетіп келеді. Мысалы, өткен жылы «Worldskills Kazakhstan» чемпионатында облыс бір алтын, екі қола медаль жеңіп алды, ал жеті қатысушы «Ең жақсы маман» медальонын алды. С.Мұқашев атындағы Атырау политехникалық колледжінің студенті Ерасыл Бағытжанов халықаралық «Euroskills» чемпионатында Польшада «Ең жақсы нәтиже» медалі мен «Ұлт мақтанышы» медалін жеңіп алған. Биыл Ерасыл Франциядағы «WorldSkills Lyon 2024» чемпионатында Қазақстанды таныстыратын болады.
Ашылу рәсімі ту көтерумен басталып, бұл сәт жарыстардың ресми басталуын белгіледі. Туды көтеру құрметі С.Мұқашев атындағы политехникалық колледжінің алтын медалисті Куаныш Бакдаулетке бұйырды. Салтанатты жиынды Атырау облысы білім басқармасының орынбасары Светлана Аманшиева ашып, қатысушыларға сәттілік тіледі.
Чемпионаттың техникалық делегаты Раушан Тілепбергенова, бұл іс-шараның 2015 жылдан бері өткізіліп келе жатқанын, оның мақсаты жұмысшы мамандықтарын насихаттау мен мәртебесін арттыру екенін атап өтті.
— Биыл байқауға 160 студент және 160 сарапшы 42 мамандық бойынша қатысуда. Колледж студенттері 12 түрлі орындарда бәсекелесетін болады. Қатысушылар саны жыл сайын өсіп келеді, ал басқа облыстардан келген сарапшылар әртүрлі бағыттағы дайындық деңгейін бағалау және студенттердің дағдыларын арттыру үшін келген. Облыстық кезеңнен өткен жастар республикалық чемпионатқа қатысып, кейін халықаралық деңгейде бақ сынау мүмкіндігіне ие болады. Атыраудағы WorldSkills чемпионаты жұмаға дейін жалғасады, және біз нәтижелерді асыға күтеміз, — деді ол.
Атырау сервис колледжінің «Аспаз» мамандығының үшінші курс студенті Ардақ Жанарыс жарыстарға дайын екенін және аспаздықтың түрлі бағыттарында шеберлігін көрсетуге дайын екенін айтты.
— Десерттер, ыстық және басқа тағамдар дайындаймын. Барлығы тамаша өтетініне сенемін. Мен бір ай уақыт дайындалдым және жарыс барысында үйренгенімді көрсетуге дайынмын, — деді болашақ аспаз сеніммен.
Сайыстар дәстүрлі оқу орындарында, мысалы, «APEC Petrotechnic» колледжінде немесе С. Мұқашев атындағы политехникалық колледжінде ғана емес, 48-балабақшада және Атырау облысының төтенше жағдайлар департаментінде де өтеді. Әр күн сайын қатысушыларды жаңа тапсырмалар мен сынақтар күтуде, мұнда біліммен қатар, тапқырлық пен жылдамдық та маңызды.
«WorldSkills Atyrau 2024» чемпионаты Атыраудағы жастардың кәсіби шеберлігін көрсету, жұмысшы мамандықтарын насихаттау, сондай-ақ еліміздің мәдениетін көтеру мақсатында өткізіліп отыр. Мұндай чемпионаттар болашақта жас мамандардың кәсіби дамуына және олардың халықаралық деңгейде бәсекеге қабілеттілігін арттыруға оң әсер етеді.
Жайна МӘЛІМҚОЖА
Суреттерді түсірген Әнуар ӘБІЛҒАЗИЕВ
