Атырауда суға шомылу кезеңі кейінге ығыстырылды

Бұл жөнінде Өңірлік коммуникациялар қызметінде өткен брифингте облыстық төтенше жағдайлар департаменті азаматтық қорғаныс басқармасының бастығы Бақыт Абланов айтты.

Спикердің айтуынша, Атырау облысында 7 сәуірден бастап төтенше жағдай режимі жариялануына байланысты Атырау облысында суға шомылу маусым айының үшінші онкүндігіне ығыстырылды.

⁃ Биыл Атырау облысында суға шомылу маусымы тек тасқын су кезеңі өтіп, акватория (су аумағы) зерттеліп, түбі тазартылған соң ғана ашылады. Судың мол келуіне байланысты облыс аумағында көптеген жайылым сулар пайда болды. Олар үлкен қауіп туындатып отыр, себебі, түбінде шұңқырлар, ағаштың бұтақтары, өткір заттар мен тұрмыстық қоқыс бар. Бұл шомыламын деген адамдарға қауіпті,- деді Б.Абланов.