Атырауда қар мен жаңбырдан жарық өшіп қалды
Толассыз жауған қардан Атырау қаласындағы және қалаға қарасты іргелес жатқан елді-мекендердің электр жүйелері өшті.
Бұл туралы «Атырау Жарық» АҚ хабарлады.
“10/6/0,4кВ кернеудегі әуе жəне кабельді электр желілерінің өшуі — магистралды 10/6кВ әуе электр желілері арқылы электр энергиясымен қамтамасыз етілетін тұтынушылардың теңгеріміндегі техникалық күтімсіз тұрған 10/6/0,4кВ кернеудегі кешенді трансформаторлық стансалары мен 10/6кВ кернеудегі әуе электр желілерінде ақаулар табылуынан екендігін хабардар етеміз.
Нақтырақ айтсақ, тұтынушылардың теңгеріміндегі кешенді трансформаторлық стансалардың 10/6кВ кернеудегі құрылымдарына су болып аққан еріген қардың ағуынан, полимерлі тірек оқшаулағыштарында тұйықталу орын алуынан апаттық сөндірулер орын алды.
Тұрғындардың электр жүйелеріне деген өтініштерін ескеріп, қалыпқа келтіру мақсатында барлығы 10 ұйымдасқан бригададан тұратын апатты жөндеу қызметкерлеріміз бен арнайы техникалар жұмылдырылып, үздіксіз қызмет атқаруда.
Электр жүйесінде апаттық сөндірулерді алдын алу мақсатында, яғни тоқ көзінің ұзақ уақытқа айырылуын болдырмау үшін, «Атырау Жарық» АҚ-ның қалалық электр жүйелерінің қызметкерлері күшейтілген режимде қызметін атқаруда.
Сонымен қатар, өзіміздің тарапымыздан қолданыстағы электр жүйесінде төтенше жағдайлар қаупін азайтуға бағытталған шаралар іске асырылуда.
Қазіргі таңда, Талғайраң, Бесікті, Атырау ықшам ауданы, Алиев көшесі, Ескі Аэропорт маңы, Бірлік-2, Томарлы, Еркінқала, Өркен, Ракуш ықшам аудандарының электр жүйелері қалыпқа келтірілуде.
Уақытша туындаған қолайсыздықтарға түсіністікпен қарауларыңыз сұралады”- делінген хабарламада.
