Атырауда полицейлер 4 қап балық тәркіледі
Atr.kz/11 наурыз, 2020 жыл. Атыраулық тәртіп сақшылары Жайық-Атырау бекіре балық өсіру зауытына кезекті балық өнімін өткізді. Облыстық полиция департаменті баспасөз қызметінің хабарлауынша, бұл жолы Балық қорына қылмыстық қол сұғушылыққа қарсы күрес бөлімінің қызметкерлері жедел-профилактикалық іс шарасы кезінде тәркіленген 4 қапқа лық толтырылып салынған бекіре балықтарын тәркіледі.
Куәгерлердің көзінше өлшенген өнімнің салмағы — 126 келіден астам. Белгілі болғанындай, тәртіп сақшылары су маржанын қала маңында орналасқан Жұмыскер кентінің 1988 жылғы тұрғынынан тауып, тәркілеген. Сотқа дейінгі тергеп-тексеру жұмыстары Қазақстан Республикасы Қылмыстық кодекстің 339 бабының 1 бөлігімен (жануарлардың сирек кездесетін және құрып кету қаупі төнген, сондай-ақ пайдалануға тыйым салынған түрлерімен заңсыз айналысу) жүргізілуде.
Атап айту керек, бұдан бұрын «Бекіре» акцияларын өткізу барысында полиция қызметкерлері табиғатты қорғау заңнамасын бұзудың 700-дей фактісін анықтап, заңсыз ауланған 6 тоннадан аса балық өнімдері, құқықбұзушы тұлғалардан 10 суда жүзу құралдары тәркіленіп, айыптұрағына жеткізілген.
Айбөпе МҰРАТҚЫЗЫ
