Бүгін, 25 қазан – Республика күніне орай Атырау облысының әкімі Серік Шәпкеновтің қатысуымен Мемлекеттік туды көтеру рәсімі өтті.
Аймақ басшысы алдымен тұрғындарды Республика күнімен құттықтады:
– Қадірменді ағайын, баршаңызды бүгінгі ұлттық мерекеміз – Республика күнімен шын жүректен құттықтаймын! Ата-бабаларымыз сан ғасырдан бері армандап өткен тәуелсіздігіміз 1990 жылы 25 қазанда Мемлекеттік егемендік туралы декларациямен келгенін бәріміз білеміз. Міне, бірнеше жылдан кейін Ұлытауда өткен ұлы жиында мемлекет басшысы Қасым-Жомарт Тоқаев осы күнді тарихи сахнаға қайта алып келуге ұсыныс білдірді. Мемлекет басшысы мен халқымыздың бірлескен шешімі аясында бұл күн қайта жаңғырды. Республика күні көк байрағымыздың көкте желбіреуі жас ұрпақтың елім, жерім деген намысын қайрай түседі деп ойлаймын. Ең бастысы, ынтымағымыз жарасып, ырысқа бөленіп жүрейік. Лайым Туымыздың тұғыры биік болсын! – деді Серік Жамбылұлы.
Салтанатты жиын жергілікті өнерпаздардың мерекелік концертіне ұласты.
А.Кенже
Суретті түсірген Ә.Әбілғазиев
