Атырауда ІІІ Ұлттық құрылтай басталды

С.Өтебаев атындағы Атырау мұнай және газ университеті базасындағы Н.Балғымбаев және М.Асаубаева орталықтарында үшінші Ұлттық құрылтайдың «Азаматтық қоғам», «Мәдениет. Өнер. Руханият» тақырыптарындағы жұмыс секцияларының отырысы басталды.

Мемлекет басшысы былтыр Түркістанда өткен Ұлттық құрылтайды қорытындылай келе «Былтыр Ұлытауда, биыл киелі Түркістанда бас қосып, елдік мәселелерді талқыладық. Ел тарихында айрықша орны бар тағы бір аймақ – Атырау облысы. Ондағы әйгілі Сарайшық қаласында атақты хандарымыз ордасын тіккен. Мен Ұлттық құрылтайдың келесі отырысын осы шежірелі аймақта өткізуді ұсынамын» деген болатын.