Атырауда Еуропа мен Азияны жалғайтын марафон өтеді
5 қазанда Атырау қаласы жыл сайынғы кең көлемдегі спорттық жүгіру жарысы — Atyrau Marathon-ды қабылдайды. Бұл — Қазақстандағы ең беделді үш марафонның бірі саналады.
Атыраудағы марафон жыл сайын кәсіби спортшыларды, жүгіруді сүйетін әуесқойларды және туристерді жинап, қаланы елдің спорттық өмірінің орталығына айналдырады.
Маршруттың ерекшелігі
Atyrau Marathon-ның басты ерекшелігі — жүгіру бағыты Жайық өзені үстіндегі көпір арқылы өтіп, Еуропа мен Азияны жалғайды. Бұл — Қазақстандағы қатысушылар материкаралық шекараны кесіп өтетін жалғыз марафон.
Марафон аясында дәстүрлі қашықтықтар қамтылады: 5, 10, 21 және 42 км. Жарыс өтетін күні қаланың кейбір көшелерінде қозғалыс шектеліп, қатысушылар мен көрермендердің қауіпсіздігі мен жайлылығы қамтамасыз етіледі.
Спорт, туризм және мәртебе
Atyrau Marathon ұйымдастырушысы Infinity Group атап өткендей, марафон тек спорттық шара ғана емес, өңірдің туристік әлеуетін арттыратын визиттік брендке айналып отыр. Жыл сайын жарысқа Қазақстанның түрлі өңірлерінен және көршілес елдерден қатысушылар келеді. Қалада спорттық туризмнің нағыз мерекелік атмосферасы қалыптасады.
Әлеуметтік миссия
Кез келген спорттық шараның басты миссиясы — жаппай қатысу және салауатты өмір салтын насихаттау. Сонымен қатар, әрине, үздік спортшылар өз жас категорияларында жеңіске жету мүмкіндігіне ие болады. Жеңімпаздарға ақшалай сыйлықтар, сондай-ақ демеушілер мен серіктестерден арнайы сыйлықтар қарастырылған.
— Atyrau Marathon — ұлттық деңгейдегі оқиға. Бұл — спортты, денсаулықты және туризмді біріктіретін бірегей платформа. Жыл сайын Атырау еліміздің жүгіру қауымдастығы мен шетелдік қонақтар үшін тартымды орталыққа айналып келеді, — деді Atyrau Marathon ұйымдастыру комитетінің жетекшісі Салтанат Сүлейменова.
Сонымен қатар, марафонның арқасында өңірде жүгіру мәдениеті қалыптасып, түрлі жүгіру секциялары мен қауымдастықтар пайда болуда. Біз осы үдерістің көшбасшысы екенімізді мақтан етеміз, – деп атап өтті Сүлейменова.
Ол марафонға барынша қолдау көрсетіп отырған Атырау қаласы мен облысы әкімдігіне, сондай-ақ басқа да мемлекеттік органдарға ерекше алғысын білдірді.
Мерекелік финал
Жарыстан кейін Infinity Ecopark алаңында концерттік бағдарлама мен отбасылық іс-шаралар өтеді. Бұл марафонды тек қатысушылар үшін емес, барша қала тұрғындары мен қонақтары үшін есте қаларлық оқиғаға айналдырады.
Қатысуға ниетті азаматтар atyraumarathon.kz сайтында тіркеле алады. Әркімнің Еуропа мен Азия түйіскен жерде өз шақырымын жүгіріп өтіп, Atyrau Marathon 2025 тарихының бір бөлігіне айналуына мүмкіндік бар.
Сурет: Ашық дереккөз
