
Атырауда «Есірткіге жол жоқ» шахмат жарысы өтті
Атырау облысы Полиция департаменті Есірткі қылмысына қарсы іс-қимыл басқармасы мен Guw_chess шахмат клубы бірлесіп, еліміздің Ата Заңының 30 жылдығына орай арнайы шахмат жарысын ұйымдастырды. Аталған шара есірткіге қарсы үгіт-насихат жұмыстары аясында өткізіліп, отбасы мүшелерінің бірлесіп қатысуына мүмкіндік берді.
Жарысқа 26 команда қатысып, әр команда ата-ана мен баладан құралды.

Шараның басты мақсаты – балаларды ерте жастан бастап есірткіге қарсы тәрбие беру, сондай-ақ, шахмат арқылы ақыл-ойды дамыту мен денсаулықты нығайту болды.
Жарыстың ашылуында Атырау облысы Полиция департаменті Есірткі қылмысына қарсы іс-қимыл басқармасының аға жедел уәкілі, полиция подполковнигі Марьяна Жанғалиева құттықтау сөз сөйлеп, қатысушыларға сәттілік тіледі. Сонымен қатар ата-аналар мен балаларға арналған «Есірткіге жол жоқ» атты бейнеролик көрсетіліп, шараның негізгі мақсаты мен маңызы жөнінде ақпараттар берілді. Жарыстың қорытындысы бойынша, бірінші орын -Бағытжан Қалиев,және Ержан Жетпiс, екінші орын — Ғабит Бисенғалиев және Ғалия Мәлік, үшінші орын — Мейрамбек Ғинаятов және Аманбек Естаевқа берілді.
Жеңімпаздар арнайы бағалы сыйлықтармен марапатталды. Барлық қатысушыларға көрсеткен белсенділігі үшін алғыс айтылып, оларға сертификаттар табысталды.
Тоғжан Ермек