Атырау агрономдары 2320 гектар жерге көкөніс пен бақша өнімдерін өсіруді жоспарлауда
Atr.kz/ 16 сәуір, 2019 жыл. Жергілікті жылыжайлардың алғашқы өнімі қалалық базарларға келді.
Атырау қаласы әкімінің орынбасары Жұмабек Қаражанов қала маңындағы ауылдық округтердегі көктемгі егістік жерлерде көкөністерді отырғызуға, жылыжайларда көктемгі егін жинауға дайындық жұмыстарын тексерді.
«Егер өткен жылы Атырауда және қала маңындағы ауылдық округтерде 2,280 гектар жерге дақыл отырғызылған болса, биыл қалалық ауылшаруашылық бөлімі әзірлеген жоспар бойынша Атырау фермерлік шаруашылықтарында 2320 гектар жерге дақыл отырғызу жоспарланып отыр. Бүгін дайындық жұмыстары басталды, агрономдар егістік алқабында көкөніс отырғызу үстінде. Сондай-ақ, тамшылатып суару жүйесі орнатылады», — деді Жұмабек Қаражанов.
Мысалы, Қайыршақты ауылдық округінде бүгінгі таңда қарбыз және көкөніс шаруашылығымен айналысатын 29 шаруа қожалығы бар. «Сабуров Е» шаруа қожалығы тамшылатып суару жүйесін пайдалана отырып, жылыжайда алғаш рет көкөніс өсіруде. Өткен жылы шаруа қожалығы Атырау нарығына 550 тонна жаңа піскен қияр жеткізді. Биыл атақты агроном Салтанат Сабуровтың ұлы шамамен 700 тонна қияр өсіруді жоспарлап отыр.
«Қазір төрт жылыжайда қияр, үш жылыжайда қызанақ өседі. Бүгін біз қала нарықтарына шамамен 40 тонна қияр жинадық, біздің өнімдеріміздің құны импортталған өнімдерден әлдеқайда төмен. Күніне екі рет өнім жинаймыз» — дейді агроном Салтанат Сабуров.
«Сағиев» шаруа қожалығы 8 гектар жерге картоп отырғызуға дайындықты бастауда. Аталмыш қожалық көкөніс өсірумен айналысатын Атыраудағы алдыңғы орындағы фермалар қатарында. Олар 40 тонна картоп пен пияз жинады.
«Біз тек екі жыл ғана жұмыс істейміз, соған қарамастан барлық технологияларды сақтай отырып, картопты алғаш рет өсірдік. Атыраудағы топырақтың өзіндік ерекшелігінен картопты барлық жерде өсіре алмайтынымыз белгілі, бірақ бұл біздің қолымыздан келді. Болашақта көкөністердің өнімділігін арттыруды жоспарлап отырмыз», — деді агроном Әлібек Борабаев.
Айта кетейік, бүгінгі күні Атырауда және қала маңында 75 мал шаруашылығы кәсіпорны жұмыс істейді, 215 шаруашылық көкөніс пен бақша дақылдарын өсірумен айналысады. Атырау қаласы әкімінің орынбасары Жұмабек Қаражанов барлық ауылдық округтердің әкімдерімен кездесті және биылғы жоспарға сәйкес көктемгі егістік жұмыстарын жүргізуді тапсырды.
Дереккөз: Атырау қаласы әкімдінің баспасөз қызметі.
