Атырауда жастар еңбек биржасы ұйымдастырған бос жұмыс орындарының жәрмеңкесі өтті, деп хабарлайды Атырау облыстық өңірлік коммуникациялар қызметі.
«Apec Petrotechnic» жоғары колледжінде бос жұмыс орындарының жәрмеңкесінде 30-ға жуық мекеме қатысып, түйіндемелер қабылдады.
Ұйымдастырушылардың айтуынша, аталған шара жастардың, қала тұрғындарының жұмыспен қамтылуына ықпал ету, әлеуметтік-экономикалық жағдайының көтерілуіне жағдай жасау, жұмыссыздықтың статистикалық көрсеткіштерін төмендетуге бағытталған.
– Бұл жоба өңірде жыл сайын өткізіледі. Әр жыл сайын жұмысқа тұрушы жастар саны өсуде. Бүгінгі жәрмеңкеге 2500-ден аса адам қатысты. Олардың барлығы өтініш беріп, жұмысқа тұру үшін түйіндемелерін қалдырды, – дейді жастар ресурстық орталығының басшысы Серік Қадыров.
Айта кетейік, өткен жылғы жәрмеңкеге 20-дан астам мекеме қатысып, 1200-ден аса адам жаңа жұмыс орындарына түйіндеме тапсырған болатын. Нәтижесінде 250-ге жуық адам жұмысқа орналасты.
Хорлан Смадияр