Атыраудағы концертте Арман Жүдебаев оркестр былай тұрсын, көрерменге де дирижерлік етті (ФОТО)

Махамбет атындағы қазақ драма театрында мемлекеттік «Дарын» жастар сыйлығының лауреаты, Құрманғазы атындағы мемлекеттік академиялық халық аспаптар оркестрінің бас дирижері Арман Жүдебаевтың шығармашылық кеші өтті. Бұл күні классиканы сүюші көрермен қарасы көп болды.

Кеш шымылдығы Түркештің «Көңіл ашарымен» ашылды. Оны Қазақстан Республикасының Мәдениет қайраткері Амантай Берғалиев жүргізді. Сондай-ақ, онда күй атасы Құрманғазының «Байжұма», «Серпер», «Адай», «Сарыарқа», «Төремұрат», күй анасы Динаның «16 жыл», Ықыластың «Жез киік», Айтқали Жайымовтың «Ереуіл атқа ер салмай», Нұрғиса Тілендиевтің «Махамбет», «Әлқисса» күйлері Дина Нұрпейісова атындағы академиялық халық аспаптар оркестрінің шебер орындауында халық жүрегіне жол тапты. Бұл шығармалар тыңдарман жүрегін елжіретпей қоймасы анық.

Сол сияқты, концертте Евгений Брусиловскийдің «Желдірме», Қаршыға Ахмедияровтың «Той күйі» туындылары жаңа нақышта орындалды. «Ел айырылған» атты халық күйі де қайта күмбірлеп сала берді. Тіпті, атақты сазгер, жазушы, публицист, музыка танушы Илья Жақановтың «Балқантау» әнінің де екінші тынысы ашылды десе де болады. Ал, Мұхиттың «Үлкен айдай» әнінің бұл жолғы орындалысы мүлде бөлек, шеберліктің шыңына шықты. Әсет Бейсеуовтің әндерінен топтастырылған поппури де құлақ құрышын қандырды.

Бірақ, классика кешінің сүт бетінде қалқыған қаймағы, бұл – қазақтың қара домбырасы мен басқа да ұлттық аспаптарымыздың сүйемелдеуімен көп көңілінен шыға білген шетелдік композиторлардың туындылары болды. Әсіресе, Сервер Какураның «Хайтарма Ай-Петри», Карл Дженкинстің «Палладио», Андерсеннің «Фидл-Фадл», Иоганн Штраустың «Радецкий марш» шығармалары әдетте «классика тыңдамайды, театрға бармайды» деп қоғамның кінәрат тағып жүрген жастарды да бей-жай қалдырмады.

Бір қызығы, Арман Жүдебаев концерт барысында оркестр былай тұрсын, көрерменге де дирижерлік етті. Көрермендер де оркестрдің әуені мен дирижердің сиқырлы таяғына елтіп, шығармаларды бірге орындап отырды.

Шара соңында облыс әкімі Нұрлан Ноғаев кеш ұйымдастырушылары мен оркестр ұжымына алғыс білдіріп, Арман Жүдебаевқа шығармашылық табыстар тіледі.

Амандық САҒЫНТАЙҰЛЫ

Суреттерді түсірген: Ерлан АЛТЫБАЕВ.

(Толығырақ «Атырау» газетінен оқи аласыздар.)