Атырауда орталық көпірден секірмекші болған 17 жасар қызды полицейлер құтқарып қалды (ВИДЕО)

Атырауда орталық көпірден секірмекші болған 17 жасар қызды полицейлер құтқарып қалды. Бұл туралы облыстық ішкі істер департаментінің баспасөз қызметі хабарлайды.

Оқиға 8 қараша күні, сағат 12:00 шамасында болған. Көпір үстінде қызметтік көлікпен келе жатқан қалалық ішкі істер басқармасының қызметкерлері – сержант Ринат Ақбалин мен аға сержант Талғат Өтемұратов, көпір қапталынан секіргелі тұрған бойжеткенді байқап қалады. Сөйтіп тоқтай қалып, жас қыздың өз-өзіне қол жұмсауына мүмкіндік бермеген.

Бүгінде суицид құрбаны болудың аз-ақ алдында қалған жас қыздың жеке-басы анықталып отыр. Ол – 2000 жылы туған, қаладағы орта оқу орындарының бірінде оқитын студент болып шықты.

Қазіргі таңда Қылмыстық Кодекстің 105-інші бабы бойынша сотқа дейінгі тергеп-тексеру амалдары басталған.

Айқара Ғұмар

Видео Атырау облыстық ІІД-нің Facebook-тегі парақшасынан алынған