«Атырау-Ақпараттың» іріктеу кезеңінде «Атырау-Жарық» жеңімпаз атанды (ФОТО)

Махамбет ауданында Елбасы Н.Ә.Назарбаевтың «Болашаққа бағдар: рухани жаңғыру» атты мақаласындағы басым бағыттарды насихаттау мақсатында «Атырау-Ақпарат» медиасеріктестігінің Кубогі үшін шағын футболдан өткізілген облыстық кезеңге іріктеу турнирі өз мәресіне жетті.

Турнирге барлығы алты команда қатысып, өз бақтарын сынады. Олар екі топқа бөлініп, облысқа жолдама алу үшін додада барын салды.

Екі топтағы жарыс аяқталғаннан соң, ІІІ орын үшін тартысты бәсекеде Орман шаруашылығы мекемесінің командасы аудандық Ішкі істер бөлімі командасын 4:1 есебімен ұтса, І орынға таласта «Атырау жарық» командасы «Автомобилистерді» 4:0 етіп жеңіп, турнирдің облыстық кезеңіне жолдама алды.

Тартысты ойын барысында ерекшелігімен көзге түскен «Атырау Жарық» командасының ойыншысы А.Салимов «Үздік ойыншы» атанса, қарсыластың соққыларын қалт жібермеген осы команданың қақпашысы Қ.Ағелеуов «Үздік қақпашы» атағына ие болды. Сонымен қатар, «Автомобилист» командасында үздік ойын үлгісін көрсете білген Р.Сұлтанов «Үздік шабуылшы» аталымына лайық деп танылса, Спорт мектебі командасының белді ойыншысы Ә.Бекжанұлы «Үздік қорғаушы» атанды.

Жарысқа қатысушылар мен жүлдегерлерге «Атырау-Ақпарат» медиасеріктестігі атынан дипломдар мен сыйлықтар табыс етілді.

 Диас ТАРАСҰЛЫ.