АРДАГЕРГЕ ҚҰРМЕТ

Облыстық ардагерлер кеңесінің төрағасы, өңірдің қоғамдық-саяси, мәдени өмірінің бел ортасында жүрген белгілі еңбек ардагері Қатимолла Ризуанов мерейлі 75 жасқа келді. Осынау атаулы күнге орай, облыс әкімі Бақтықожа Ізмұхамбетов мерейгерді оның жұмыс кабинетіне барып, арнайы құттықтады.

«Дана Абай айтқандай, ел ішінде бес асыл қасиетті бойына сіңірген азаматтар болады. Зейнет жасына шыққаныңызға қарамастан, ел ісіне араласып, кейінгі буынға ағалық ақылын айтып жүрген сіз осындай аз шоғырдың бірі де, бірегейісіз» деген өңір басшысы Бақтықожа Ізмұхамбетов ардагердің әркез сапта екендігін айрықша атап өтті. Мерейгерді құттықтап, отбасы амандығын тіледі. Одан әрі Қатимолла Ризуановқа естелік сыйлығын табыстады.

«Облыс басшысының үлкенге құрмет көрсетіп, кабинетке келіп құттықтауы бойымда ерекше ризашылық сезім туғызды. Біз шамамыз келгенше жастар тәрбиесінен ажырамауға жұмыстанамыз. Ардагерлерді келешек үшін жасалатын келелі істер күтіп тұр» дейді мерейгердің өзі.
Қартын қашанда қазынасына балаған қазақ үлкендерден сый-құрметін еш аямаған. Осындай игі өнеге ұрпаққа үлгі болуы тиіс.

Баян ЖАНҰЗАҚОВА.

Баға берсеңіз
Атырау газеті
Пікір қалдырыңыз