АМӨЗ: тазарту қондырғылары қашан іске қосылады?
Атырау мұнай өңдеу зауытында механикалық тазарту қондырғыларын реконструкциялау жобасының II кезеңін іске қосу-баптау жұмыстары жүруде.
Бұл кезең аясында ағынды су орташа резервуарлары, сорғы станция ғимараттары, өзін-өзі шайғыш сүзгілер мен флотация блоктары салынған болатын. Қазір қашықтықтан басқару, технологиялық қорғау мен бұғаттау, сондай-ақ автоматты өрт дабылы жүйелерін баптау жұмыстары жалғасуда. Желдету және түтінге қарсы қорғау жүйелерінің жұмыстары тексеріліп, технологиялық, электротехникалық және бақылау-өлшеу аспаптары сынақтан өткізіліп жатыр.
Iске қосу-баптау жұмыстары сәуір айында аяқталады деп күтілуде. Екінші кезеңді іске қосу мамырға жоспарланған. Реконструкциялау нәтижесінде механикалық тазарту қондырғыларының өнімділігі 2 есе артпақ. Тазартылған судың бір бөлігі зауыттың өндірістік қажетіне жұмсалып, Жайық өзенінің суын пайдалану көлемі 9%-ға азаяды.
Айта кету керек, Tazalyq экологиялық жобасы аясындағы механикалық тазарту қондырғыларын реконструкциялау жұмыстары Еуропалық қайта құру және даму банкінің қарыз қаражаты есебінен жүзеге асырылуда.
