ӘЙЕЛДЕРГЕ – АЯЛЫ АЛАҚАН
«Әйел бала тәрбиесінде маңызды рөл атқарады. Сол себепті оларға қандай көмек жасасақ та артық емес» деген ол бала күтіміндегі аналардың мерзімінен бұрын қызметке шығуы материалдық жағдайдың жетіспеушілігінен туындап отырғанына тоқталды. Оның айтуынша, бүгінгі күні балаға бір жасқа дейін ай сайын төленетін жәрдемақы 10 мың 186 теңгені құрайды. Ал, өмір сүрудің ең төменгі көрсеткіші 19 мың 966 теңге десек, бұл жәрдемақы баланың керек-жарағына аздық ететіні анық.
Ағымдағы жылы елімізде біржолғы мемлекеттік жәрдемақы бірінші, екінші және үшінші балаға – 55 мың 560, ал, төртінші балаға 92 мың 600 теңгені құрап отыр. Бұл шет мемлекеттермен салыстырғанда, әлдеқайда төмен. Ерболат Ғұсманұлы Қазақстанда жәрдемақыны көбейту, әлеуметтік жағдайы төмен отбасыларына коммуналдық қызмет төлемдеріне, қоғамдық көлікте жүруде жеңілдіктер енгізу, сондай-ақ, шалғай ауылда тұратын аналарға көмір мен отын алуға өтемақы қарастыру сияқты ұсыныстарды ортаға салды. Бұл пікірді жиынға қатысушы партия филиалдарының өкілдері де қолдады.
