12 жастағы қыз бала көз жұмды: Қырғыз-тәжік шекарасындағы қақтығыстан зардап шеккендер саны артты
Қырғызстан мен Тәжікстан шекарасындағы қақтығыста қаза болған қырғыз азаматтарының саны үшке жетті, олардың арасында 12 жастағы қыз бар.
Қырғызстанның Денсаулық сақтау және әлеуметтік даму министрлігінің мәліметінше, қаза болғандардың бірі бірі — 2008 жылы туған қыз. «Ол ауруханаға бара жатқан жолда қайтыс болды», — деді ведомстводағылар.
Сондай-ақ, сағат 00:00-дегі жағдай бойынша, қырғыз-тәжік шекарасындағы қарулы қақтығыста зардап шеккендер саны 84-ке жеткені хабарланды.
Қырғызстан ұлттық қауіпсіздік комитетінің шекара қызметі қақтығыс аймағында атыс тоқтағанын мәлім етті.
«Баткен облысында орналасқан Қырғызстан Республикасы Ұлттық қауіпсіздік мемлекеттік комитетінің Шекара қызметінің бөлімшелері мен құрамалары жергілікті мемлекеттік органдармен, күш құрылымдары бөлімшелерімен және құқық қорғау органдарымен бірлесіп, жағдай бұдан әрі өршіп кетуіне жол бермеу үшін барлық қажетті шараныды қабылдап жатыр», — деді ведомствоның баспасөз қызметі.
Еске салайық, кеше қырғыз-тәжік шекарасында жағдай шиеленісіп, атыс басталғаны хабарланған болатын. Артынша кеше, 29 сәуірде кешкі уақытта екі ел атысты тоқтату туралы шешімге келген.
