МЫҢНАН АСА ОҚУШЫ КҮЙ ТАРТЫП, РЕКОРД ОРНАТТЫ! (+видео)
NIS-тің мың домбырашысы Гиннесс рекордтар кітабын бағындырды.
Елордадағы физика-математика бағытындағы Зияткерлік мектепте биылғы оқу жылы айтулы және көптен күткен оқиға – домбыра сабағымен аяқталды, оны Гиннесс рекордтар кітабына «Ең ауқымды домбыра сабағы» атауымен онлайн тіркеу жоспарланып отыр. Қазақ халқының басты музыкалық аспабында бір мезгілде мың оқушы ойнады.
Ең ауқымды домбыра сабағына қосымша білім беру педагогы, Қазақстан Республикасының еңбек сіңірген мәдениет қайраткері Айтжан Тоқтаған дирижерлік етті. Мыңдаған оқушының орындауында «Сарыарқа», «Балбырауын», «Еркем-ай», «Кеңес», «Жастар биі» сынды атақты күйлер күмбірлеп, туындылардың шығу тарихы баяндалды.
- Елордадағы физика-математика бағытындағы Зияткерлік мектеп оқушылары бүкіл әлемге біздің еліміз бен мәдениетімізді, халықтың жаны деп атауға болатын басты музыкалық аспапты таныстырды. Нағыз қазақ – домбыра екенін бәріміз жақсы білеміз, сондықтан бүгінгі күнді тарихи деп атауға болады, – деп мойындады «Назарбаев Зияткерлік мектептері» ДББҰ Басқарма төрайымы Күләш Шәмшидинова.
Ел астанасындағы физика-математика бағытындағы NIS-те домбыра бойынша элективті курстар 2016 жылы енгізілді. Айтжан Тоқтағановтың жетекшілігімен құрылған мектепішілік «Жігер» ансамблі көптеген республикалық және халықаралық музыкалық байқаулардың жеңімпазы, «Sun of Italy» итальяндық фестиваль-байқауының бас жүлде иегері, АҚШ-тың атақты Гарвард пен Бостон университеттері және Массачусетс технологиялық институты сахналарында өнер көрсетті.
- Домбыра – әрбір қазақ үшін қасиетті аспап, ал біздің сабағымызды Гиннесс рекордтар кітабына енгізу – бұл домбыраны бүкіл әлемге паш ету, – деп атап өтті Айтжан Тоқтаған.
Guinness World Records-қа (GWR) өтінім 2021 жылдың желтоқсан айында берілді. Гиннесс рекордтар кітабының талаптары бойынша ауқымды сабақты 25-тен астам стюард пен 2 куәгер қадағалады. Әрбір 50 қатысушыны бір тәуелсіз стюард бақылап, бейнежазба аймағынан шыққан немесе қажетті әрекетті орындамаған топтағы кез-келген қатысушыны дисквалификациялау жұмысына жауапты болды. Куәгерлер GWR-дің сенімді өкілі ретінде қызмет атқарып, рекордтың орнауы мен Кітаптың барлық критерийлерінің толық сақталуын қамтамасыз етті.
Guinness World Records ережелеріне сәйкес ауқымды сабақ басталар алдында барлық қатысушы екі тіркеу пунктінен өтті: біріншісі – жеке бейдждерін сканерлеп, «Кандидат-маркер» бағдарламасы арқылы аймаққа кірді, екіншісі – кезекші қатысушылардың механикалық есебін жүргізді.
– Мен Зияткерлік мектепке түскеннен кейін домбыра тартуды үйрендім. Ал қашықтан білім алып жүрген кезде бейнесабақтар арқылы меңгере бастадым. Бүгін біз үшін ерекше күн. Әрине, қобалжу болды, алайда Гиннесс кітабына күй орындағанымызға қуаныштымыз және бұл рекордты домбыраға арнаймыз, – деп 9-сынып оқушысы Ерасыл Айбекұлы өз әсерімен бөлісті.
Бір мектептің мыңға жуық оқушысы ұлттық музыкалық аспапты жетік меңгеріп, бірге күй орындауы әлемдегі тұңғыш оқиға. Қазақстандық рекорд аса көрнекті жетістіктер мен бірегей құбылыстар туралы жаһандық анықтамалыққа енгізіледі деп жоспарлануда.
Кеше барлық Зияткерлік мектептердегі оқу жылы домбыра сабағымен аяқталды. Атырау қаласындағы ХББ НЗМ-де «100 күй» жобасы аясында ұлттық құндылығымыз, асыл мұрамыз домбыраны дәріптей отырып, тұрмыс-тіршілігімізді, мәдениетімізді бейнелейтін өнердің биік шыңы күй құдіретін ұғынуды мақсат еткен «КҮЙ — ҚҰДІРЕТ, КҮЙ — КИЕ» атты домбыра сабағы өтті.
Домбыра тарту шеберлігін дұрыс меңгеруге, оқушының өнерге деген ынта-ықыласын өсіріп, эстетикалық талғамын арттыруға, музыканы дұрыс тыңдап, терең түсіне білуге баулитын шарада дәулескер күйші Құрманғазы Сағырбайұлының өмірі мен шығармашылығы турасында сөз қозғалды.
Мұндай ауқымды шаралар легі алдағы уақытта да жалғасын таба бермек.
