Өңірде халықаралық шахмат турнирі басталды

Атырауда халықаралық деңгейдегі «Atyrau Chess Masters» шахмат турнирі басталды. 5-15 қыркүйек аралығында өтетін додаға әлемнің алты мемлекетінен мықтылар жиналып, ой жүйріктерінің өнерін паш етпек. Бүгін Н. Жантөрин атындағы облыстық филармонияда халықаралық турнир салтанатты жағдайда ашылды.

Бұл сайыстың басты мақсаты – жастарға салауатты өмір салтын насихаттау, халықаралық мәдени-спорттық байланысты нығайту, сондай-ақ қазақстандық шахматшылардың кәсіби шеберлігін шыңдап, әлемдік рейтингтегі орнын көтеру. Сондай-ақ, ұлттық құраманың бәсекеге қабілеттілігін арттырып, еліміздің зияткерлік әлеуетін дамытуға жол ашу да басты назарда.

Жарысқа барлығы 20 шахматшы қатысады. Олардың қатарында Грузия, Польша, Шри-Ланка, Украина, Әзірбайжан, Белорусь және Швециядан келген ой шеберлері бар. Қатысушылар екі топқа бөлінген: А тобы – халықаралық мастер (IM) нормасына таласатын 10 шахматшы. Олардың кемінде төртеуі шетелдік, ал рейтингтері 2450-дан жоғары. B тобы – әйелдер арасындағы халықаралық мастер (WIM) нормасы үшін бақ сынайтын 10 шахматшы. Мұнда да кем дегенде төрт шетелдік ойыншы бар, рейтингтері 2250-дан жоғары.

-Бұл менің Қазақстандағы ойынға екінші рет, Атырауға тұңғыш келуім. Осындай жоғары деңгейдегі сайыс үшін ұйымдастырушыларға алғыс айтамын. Турнир қатысушыларына сәттілік тілеймін,-дейді Шри-Ланка елінен келген Дильшах Ранинду.

Жалпы, турнир 9 турдан тұрады. Әр партияда шахматшыларға алғашқы 40 жүріске 90 минут, одан кейін қосымша 30 минут уақыт беріледі. Сонымен бірге, әр жүрістен бастап 30 секунд қосымша уақыт есептеледі. Ережеге сай, алғашқы 30 жүріс аяқталмай тең ойнауға келісім жасауға тыйым салынған.

Зияткерлік сайыстың приздік қоры – 5 000 АҚШ доллары. Оның ішінде А тобына – 3 000, ал B тобына – 2 000 доллар үлестіріледі.

Атырау төрінде тұңғыш рет ұйымдастырылып отырған бұл дода еліміздің шахмат дәстүрін жаңа биікке көтеріп, жас буынға үлгі болары сөзсіз.

Айбөпе САБЫРОВА
Суреттерді түсірген Ерлан АЛТЫБАЕВ