Атыраулық жас каратэшілер Әлем чемпионатына жолдама алды
Батыс Қазақстан облысының орталығы — Орал қаласындағы “JAIYQ ARENA” спорт кешенінде каратэден (WKС) жасөспірімдер, кадеттер және ардагерлер арасындағы ІІ Азия чемпионаты, сондай-ақ балалар арасында өткен Азия Кубогы өз мәресіне жетті. Дүбірлі додада Қазақстанның намысын қорғаған Атырау облысының спортшылары табысты өнер көрсетіп, жүлделі орындармен оралды.
Атыраулық команданың жаттықтырушысы Абат Елжасұлының айтуынша, аталған жарыста 19 елден барлығы 500-ден астам спортшы сынға түскен.
Жарыстың ашылу салтанатына Батыс Қазақстан облыстық дене шынықтыру және спорт басқармасының басшысы Бақдәулет Сәбитов пен Каратэ WKC/FW Дүниежүзілік конфедерациясының президенті Александр Тимофеев қатысты. Ауқымды іс-шараның басты мақсаты – каратэ шеберлерінің кәсіби біліктілігін арттыру, шыңдау.
Тартысты додада жекелей кумитэ бойынша атыраулықтар бірқатар нәтиже көрсетіп, 4 қола, 2 күміс, 2 алтын медальге ие болды.
Айзере Ғалымжан, Әлихан Ізғали, Исмаил Бақтияр, Нұралы Жеткіншекұлы қола жүлдені иеленді. Аңсар Назар мен Нұрдәулет Әлдебай күміс жүлдегер атанса, Бекасыл Түгіл мен Алихан Ғалымжан алтын медальді жеңіп алды.
Командалық кумитэде 12-13, 10-11 жас аралығындағы жасөспірімдер де жоғары нәтиже көрсетті. Нұралы Жеткіншекұлы, Алихан Ғалымжан, Әлихан Ізғали — ІІ орын, Исмаил Бақтияр, Бекасыл Түгіл, Нұрдәулет Әлдебай ІІІ орынды иеленді.
– Біз Азия чемпионатына жыл басынан бастап дайындалдық. Спортшыларымыздың тынымсыз еңбегінің нәтижесінде осындай көрсеткішке қол жеткіздік. Жеңіс тұғырынан көрініп, түрлі дәрежедегі жүлделер мен атақтарға ие болдық. Ең бастысы – каратэшілеріміз келесі жылы Үндістанда өтетін Әлем чемпионатына жолдама алды. Бұл біз үшін үлкен мүмкіндік әрі зор жауапкершілік. Ендігі мақсат – осы жетістікті еселеп, әлем чемпиондарын тәрбиелеу. Ол үшін қазірден бастап үздіксіз дайындық қажет. Осы меже үшін талмай жұмыстанамыз, — дейді бапкер Абат Елжасұлы.
Айта кету керек, Азия чемпионатына спортшыларды жаттықтырушылар Аманғали Өтебалиев, Абат Елжасұлы мен Дамир Ыбырашевтар дайындады. А.Өтебалиев пен А.Елжасұлы Азия чемипонатына төреші болып қатысты. Сонымен қатар чемпионатта бапкерлер арасында бақ сынап, сынға түскен А.Елжасұлы мен Д.Ыбырашев ІІ-ІІІ орынды жеңіп алып, шәкірттеріне үлгі бола білді.
А.НӘСІПҚАЛИҚЫЗЫ
