Атырауда Номад ММА-дан республикалық чемпионат басталды
Номад MMA — аралас жекпе-жек стиліндегі спорт түрі, онда спортшылар жұдырықпен соғу және тебу әдістерін қолданады. Кеше Атырау қаласындағы теннис орталығында аталмыш спорттан жасөспірімдер, жастар және ересектер арасында республикалық чемпионат басталды. Чемпионаттың ашылу салтанатына қатысқан облыстық дене шынықтыру, спорт және туризм басқармасы басшысының міндетін атқарушы Нұрбол Сыдықов қатысушыларға сәттілік тіледі.
— Атырауға арман қуып, ойдағы асуларын бағындыруға келген споршыларға “қош келдіңіздер” дейміз. Номад MMA спорты соңғы жылдары әлемде қарқынды даму үстінде. Маңызды спорттық додаға Қарағанды облысынан осы спорт түрінің негізін қалаушы Сергей Валентинович арнайы қатысып отыр. Чемпионат батыр бабаларымыздың ерлігін насихаттауға, жалғастыруға, салауатты өмір салтын қалыптастыруға септігін тигізеді деген ойдамын. Барша жігерлі жандарға сәттілік тілеймін. Мемлекет тарапынан спортшыларды қолдау ісі жүйелі түрде жүзеге асырылуда. Өңірде осы салаға бағыттауға арналған үйірмелер, қосымша мекемелер көптеп ашылуда. Елдің намысын қорғар мықты спортшылардың қатары көбейе берсін,-деді Н.Сыдықов.
Бұл тартысты додада Астана, Алматы, Шымкент, Семей, Өскемен қалаларынан және Алматы, Қарағанды, Қызылорда, Павлодар, Маңғыстау, Ақтөбе облыстарынан 500-ге жуық спортшы бақтарын сынауда. Қазақстан Республикасы чемпионатының жеңімпаздары алдағы уақытта Азия, Әлем чемпионаттарында ел намысын қорғайды.
Еркеназ ҚАЛИЖАН
