Атырауда бокстан II Халықаралық турнир басталды

Admin03.04.2025 02:34

Кеше еліміздің мұнайлы астанасы Атырау өңірінде Кеңестер Одағының бес дүркін жеңімпазы, Халықаралық дәрежедегі спорт шебері, Атырау облысының Құрметті азаматы Болат Теміровты еске алуға арналған бокстан ерлер арасындағы II Халықаралық турнирінің ашылу салтанаты өтті.

Тартысты додаға облыс әкімінің орынбасары Дарын Шамұратов қатысып, былғары қолғап шеберлеріне сәттілік тіледі.

— Спорт десе делебесі қозбайтын адам жоқ. Соның ішінде бокстың орны ерекше. Бұл турнир жастар арасында осы спорт түріне қызығушылықты арттыру, өмірден өткен өңірдің мақтанышы Болат Бисенұлының есімін ұлықтау мақсатында дәстүрлі түрде ұйымдастырылып отыр. Барша қатысушыларға сәттілік. Шын мықтылар ғана жеңіске жетуін тілеймін, — деді Д.Шамұратов.

Салтанатты шараға арнайы қатысқан Пекин Олимпиадасының жеңімпазы, U-22 жастар арасындағы Қазақстан Республикасының аға бапкері Бақыт Сәрсекбаев елімізде спорттың жоғары деңгейде дамып жатқанын, маңызы зор турнирде спортшылардың шама-шарқысын жіті қадағалайтынын жеткізді. Келесі сөз кезегі Болат Теміровтың жұбайы Зухра Тухпатқызына беріліп, ол халықаралық дәрежеде турнирдің өтуіне мұрындық болғандарға отбасы атынан зор ризашылығын білдірді.

Облыстық дене шынықтыру, спорт және туризм басқармасы мен Атырау бокс федерациясының бастамасымен болатын турнирге еліміздің түкпір-түкпірінен және шет мемлекеттерден 200-ге жуық былғары қолғап шеберлері қатысуда. Бұл дода 22 жасқа дейінгі Қазақстан ұлттық құрамасының алдағы болатын Азия чемпионатына дайындығы іспетті.