Қызылқоға ауданында «Атырау-Ақпараттың» кубогі үшін мини футболдан іріктеу кезеңі басталды (ФОТО)

Қазақстан Республикасының Президенті Н.Ә.Назарбаевтың «Болашаққа бағдар: рухани жаңғыру» атты мақаласындағы басым бағыттарды насихаттау мақсатында «Атырау-Ақпарат» медиасеріктестігінің Кубогі үшін ұйымдастырылған шағын футболдан облыстық кезеңге іріктеу сыны бүгін Қызылқоға ауданында басталды.

Оған аудандағы мемлекеттік мекемелер мен бөлімдерден құралған «Достық», «Тұлпар», «Жігер», «Айбын» «Барыс», «Қыран» және «Намыс» командалары қатысуда.

Миялы спорт кешенінде өтіп жатқан жарыс еліміздің Әнұранымен ашылып, артынша аудан әкімі аппаратының басшысы Марат Әбуов, аудандық «Қызылқоға» газетінің бас редакторы Бауыржан Сисенов, ардагер журналист Жолдас Жанқуатовтар құттықтау сөз сөйлеп, жарысқа қатысушы командаларға сәттілік тіледі.

Содан соң Миялы балалар өнер мектебінің «Айжан-ай» бишілер тобы спорттық би билеп, шара шырайын кіргізе түсті.

Ашылу салтанатынан соң командалар екі топқа бөлініп, тартысты ойынды бастап кетті. Алғаш болып құқық қорғау органдарынан біріккен «Тұлпар» командасы мен аудандық балалар-жасөспірімдер спорт мектебінің «Айбын» командасы алаңға шығып, «тұлпарлықтар» қарсыластарын 3:1 есебімен жеңді.

Айта кетейік, осы сында жеңімпаз атанған команда қараша айында өтетін облыстық туринирге жолдама алады.

Дулат ҒҰБАЙДУЛЛИН