Қала көшелеріне 200-ге жуық шырша егіледі

Демеушілер өңірге канадалық және Глаука көк шыршасын жеткізді, — деп хабарлайды Өңірлік коммуникациялар қызметі.

Қылқан жапырақты ағаштар Орал қаласындағы бақта өсірілген.

-Шамамен ұзындығы 2 метр болатын шыршалар түп-тамырымен жеткізілді. Қаланың сәнін келтіретін канадалық және глаука көк шыршасы 4-5 метрге дейін өседі. Қазір олар Қаныш Сәтбаев даңғылының бойына, ретросаябақ пен теміржол вокзалының аумағына отырғызылды. Бұл жұмыс қала аумағын абаттандыруға бағытталған, — деді қалалық әкімдіктің баспасөз-хатшысы Ғасырбек Төлеген.

Бұдан бөлек, алдағы уақытта шахар аумағына жергілікті бақтар мен Ресейдің Тольятти қаласынан 300-ге жуық ақ қайың әкеліп, егу жоспарланып отыр.