ҚР Президенттігіне кандидат Салтанат Тұрсынбекованың сайлауалды штабы жұмысын бастады
Елордада ҚР Президенттігіне кандидат Салтанат Тұрсынбекованың сайлауалды штабы жұмысын бастады, деп хабарлайды ҚазАқпарат тілшісі.
Орталық штабта бірнеше қызметкер бар және қажетті жағдайлар жасалған.
Штаб өкілдерінің айтуынша, сайлауалды үгіт-насихат жұмысын жүргізу үшін кабинеттер, техника және байланыс бар. Үгіт-насихат науқанынан бес күні бұрын штаб қызметкерлері сайлау заңнамасының талаптарымен танысты.
Осылайша бүгін сағат 18:00-де республикалық штаб мүшелері ҚР Президенттігіне кандидат Салтанат Тұрсынбекованы қолдау жұмысына кірісті.
Сондай-ақ, елордадағы штабта 10-ға жуық адам жұмыс істейді. Одан бөлек, еліміздің 20 өңірінде штаб филиалдары орналасқан.
Штаб мүшелері үгіт-насихат науқанына дайындық жұмысы барысында ешқандай проблема туындамағанын атап өтті. Олар үгіт-насихат жұмыстарына дайын.
