Елдігіміздің айнасы

Қазақстан Республикасының Конституциясы – біздің елдігіміздің, тәуелсіздігіміздің, бірлігіміз бен тыныштығымыздың тірегі. Президент Қасым-Жомарт Тоқаев бүгінгі мәлімдемесінде ерекше атап өткендей, заң үстемдігі мен азаматтардың құқығын қорғау – мемлекеттігіміздің ең басты бағдары.

Мен үшін бұл мерекенің орны ерекше. Себебі мен – Конституция құрдасымын. Менің өмір жолым Ата заңның қолданысқа енуімен қатар басталды, бірақ оның ел өміріндегі тарихи рөлі мен салмағы өлшеусіз. Ата Заңымыз – халқымыздың таңдауымен қабылданған, ел ертеңіне бағыт берген құжат. Әр азамат секілді мен де Конституцияны қастерлеп, оның талаптарын орындауды қасиетті борышым деп білемін.

Қазақстан Республикасы Ұлттық ұланының 5546 әскери бөлімінде қызмет атқара отырып, еліміздің тыныштығын сақтау, азаматтардың құқығы мен бостандығын қорғау – менің күнделікті міндетім ғана емес, мақтанышым. Өйткені бұл – Конституция бекіткен ең басты құндылықтардың бірі.

Президентіміз атап өткендей, «Адам және адамның өмірі, құқықтары мен бостандықтары – ең қымбат қазына». Бұл қағида әрбір сарбаздың жүрегінде берік орын алуы тиіс. Біз заңды қорғап қана қоймай, оны өзіміз де мүлтіксіз орындауымыз керек. Сонда ғана әділетті қоғам орнайды, ел тұрақтылығы нығаяды.

Тоғжан АТЕНОВА,

Қазақстан Республикасы Ұлттық ұланы 5546 әскери бөлімінің кіші сержанты