Атырауда «Халық заңгері» республикалық акциясы өтпек
16 қыркүйек күні сағат 16:00-де Қазақстанның барлық ірі қалаларында «Халық заңгері» жалпыреспубликалық акциясы басталады.
Акцияның мақсаты — халықтың құқықтық сауаттылығын арттыру және тегін заң жөнінен көмек көрсету. Оған белгілі заңгерлермен қатар, нотариустар, прокурорлар, тергеушілер, сот орындаушылары, полиция, әділет қызметкерлері, көші-қон полициясы, жылжымайтын мүлікті тіркеу бөлімі, мемлекеттік органдардың басшылары және т.б. мамандар қатысады. Акцияны Қазақстан Республикасының Сыбайлас жемқорлыққа қарсы іс-қимыл агенттігі, ZAKON.KZ желілік басылымы және «Параграф» ақпараттық жүйесі ұйымдастырып отыр. Осы жылдар ішінде «Халық заңгері» акциясының қажет екені байқалып, дәстүрлі түрде өткізіле бастады. 2016-2019 жылдар аралығында акцияға 7000-нан астам үздік сарапшылар мен мемлекеттік органдардың шешім қабылдай алатын құзіретке ие өкілдері қатысты. Құқықтық көмекке жүгінген 100 000-нан астам адам кеңес алды.
Карантиндік шектеулер енгізілген кезеңде «Халық заңгері» акциясын өткізу тоқтатылды. 2022 жылы санитарлық-эпидемиологиялық жағдайдың қалыпқа келуіне байланысты бұл әлеуметтік маңызы бар іс-шара қайта жандана бастады. 16 қыркүйек күні сағат 16:00-де Қазақстанның барлық қалаларында — Нұр-Сұлтан, Алматы, Шымкент, Қарағанды, Өскемен, Петропавл, Орал, Қызылорда, Көкшетау, Ақтөбе, Атырау, Ақтау, Тараз, Қостанай, Павлодар, Балқаш, Семей, Қонаевта «Халық заңгері» атты жалпыреспубликалық акция басталды. Атырау қаласында мекенжайы бойынша Құлманов көшесі, 111 А, «Baizaar» сауда орталығында өтеді. Кіруі тегін.
