Ата Заң – айбынды армияның темірқазығы

Бүгін Атырау гарнизонында Қазақстан Республикасының Конституциясына 30 жыл толуына орай «Батыс» өңірлік қолбасшылығының салтанатты жиыны өтті.
Мемлекеттіліктің берік тұғырына айналған Ата Заң мерекесі әскерилер үшін айрықша мәнге ие. Осы күні сап түзеген сарбаздар ел тәуелсіздігін қорғау жолындағы мәртебелі міндетті тағы бір мәрте жүректеріне түйгендей болды.

Жиында «Батыс» өңірлік қолбасшылығының қолбасшысы генерал-майор Бауыржан Артықов құттықтау сөз сөйлеп, Қорғаныс министрлігінің және Құрлық әскерлері Бас қолбасшылығының ыстық сәлемін жеткізді.

– Құрметті офицерлер мен сержанттар, сарбаздар! Сіздерге Қарулы Күштеріміздің басшылықтарының құттықтауын жеткізуге қуаныштымын. Конституция мемлекеттің тұрақтылығы мен дамуының негізі, әрбір қазақстандықтың құқықтары мен бостандықтарының кепілі. Қазақстан Республикасы Конституциясы Елтаңба мен Гимн секілді тәуелсіздігіміздің, егемендігіміздің айшықты нышаны. Сондықтан оны қорғау әрбір азаматтың, әсіресе әскери қызметшінің қасиетті борышы, — деді генерал-майор.

Салтанатты жиын барысында генерал-майор әскери қызметте жоғары кәсібилік пен тәртіп үлгісін көрсеткен бірқатар офицерлер мен сарбаздарға арнайы марапаттар табыс етті. Лауазымдық міндеттерін адал орындағаны және үлгілі тәртібі үшін әскери қызметшілерге алғыс хаттар берілді. Олардың қатарында майор Талғат Сұлтанов, капитан Ринат Асқарбекұлы, майор Ертай Ернар және басқа да бірқатар жауынгерлер бар.
Марапат иелері үшін бұл – еңбектің еленгені, ел сенімін ақтаған адал қызметтің айғағы. «Әскери адам үшін ең үлкен марапат – Отан алдындағы борышты абыроймен атқару. Бұл марапат тек менің емес, бүкіл қаруластарымның еңбегіне берілген баға», — деді капитан Ринат Асқарбекұлы.
Салтанатты шара Конституцияның құндылықтарын дәріптеп қана қоймай, ел тыныштығын күзеткен әскери қызметшілердің адал еңбегін айшықтаған тағылымды басқосу болды.

Майра ЕРҒАЛИ
Суреттерді түсірген Әнуар ӘБІЛҒАЗИЕВ