Әскердің қуаты — тылдың тынысында

Бүгін, 28 тамыз — Қазақстан Қарулы Күштеріндегі тыл мамандарының кәсіби мерекесі. Бұл күн әскердің тыныс-тіршілігін қамтамасыз етіп, сарбаздың ас-ауқатынан бастап, киімі мен тұрмысына дейінгі барлық қажетін өтеп жүрген жандарға арналады. «Қарны тоқ сарбаздың қадамы нық» деген нақыл сөз осының дәлелі іспетті. Әскердің қуаты тылдың тынысында екені айқын.
Атырау гарнизонында да жылдар бойы осы жауапты міндетті адал атқарып жүрген мамандар бар. «Бірлік бар жерде тірлік бар» дегендей, алғы шептегі сарбаздың табысы арттағы тылдың берік тірегіне байланысты екені белгілі.

«Батыс» өңірлік қолбасшылығы Тылмен қамтамасыз ету басқармасы азық-түлік қызметінің бастығы, подполковник Нұрболат Жакеев әріптестерін мерекемен құттықтап, лебізін білдірді.

–Әскерді жан-жақты қамтамасыз ету үлкен жауапкершілікті қажет етеді. Сарбаздың уақытылы ас ішіп, бойы жылы болып, тұрмысы жайлы болуы – біздің басты міндетіміз. Бұл әскери әзірліктің мызғымас кепілі. Барлық әріптестерімді кәсіби мерекемізбен құттықтаймын. Отан алдындағы қызметіміз абыройлы болсын, — деді Нұрболат Байболатұлы.

Шынында да, сарбаздың рухы асқақ болуы үшін оның жағдайын жасап отырған тыл мамандарының еңбегі өлшеусіз. Олардың әр күні үздіксіз қайталанатын жауапты іске толы.
Бүгінгі атаулы күнде ел тыныштығын күзеткен сарбаздарға арқа сүйеп, бейбіт тіршіліктің берекесін сақтап жүрген тыл мамандарына айтар алғысымыз зор.

Майра ЕРҒАЛИ