Атырау облыстық мәслихатының әлеуметтік және мәдени даму мәселелері жөніндегі тұрақты комиссиясының кезекті отырысы өтті. Оған төраға Нұрлыбек Даралиев қатысып, тұрмыстық зорлық-зомбылық проблемасы талқыланды.
Жиынға келген жергілікті полиция қызметі басқармасының бастығы, полиция полковнигі Ерлан Биғамбаевтің айтуынша, тұрмыстық зорлық-зомбылық үшін әкімшілік және қылмыстық жауапкершілік қатаңдатылды. Әкімшілік қамақтың нақты мерзімдері белгіленді. Сондай-ақ, Қылмыстық кодекстің жекелеген баптарына өзгерістер енгізілді.
Заңға енгізілген түзетулер зардап шегушінің арызынсыз, тұрмыстық зорлық-зомбылық дерегі негізінде әкімшілік құқықбұзушылық туралы іс қозғауға мүмкіндік берді. Хаттама толтыру үшін куәгерлердің, көршілердің айғақтары, бейнебақылау мен бейнетіркеушінің жазбалары болса, жеткілікті. Түпкілікті шешімді сот қабылдайды.
– Облыста зәбір көрген әйелдермен жұмыс істейтін қызметкерлердің санын арттыру үшін қосымша 29 штат ашу жоспарлануда. Зорлық-зомбылықтың алдын алу бағытында «Тұрмыс», «Есептегі адам» іс-шаралары өтті. Жыл басынан бері облыста отбасы-тұрмыстық сипаттағы 4 қылмыс тіркелген. Енді жәбірленуші арыз жазбаған болса да, құқықбұзушы жазаланады. Бұл тұрғыда жанжалқор адам өзінің құрбанынан психологиялық және физикалық тұрғыдан «арызыңды қайтып ал» дегендей қысым жасай алмайды. Сондай-ақ, қиындық көрген әйел адамдарға көмек көрсету үшін дағдарыс орталығында көмектеседі. Екі ай ішінде 26 адам орналастырылса, оның 7-уі – әйел адам және 19-ы – бала, – деді Ерлан Биғамбаев.
Биғамбаевтың айтуынша, отбасындағы негізгі дау-жанжал ішімдік ішу салдарынан туындайды. Ол комиссияның осы мәселеге көңіл бөлуін сұрады.
Майра ОРАЗҒАЛИЕВА
Суреттерді түсірген Ерлан АЛТЫБАЕВ
