Жастарды қолдау болашаққа жол бастайды

Мемлекет басшысы Қасым Жомарт Тоқаев Қазақстан халқына «Әділетті Қазақстан: заң мен тәртіп, экономикалық өсім, қоғамдық оптимизм» атты Жолдауында жастарға қолдау көрсету – мемлекеттің басты міндетінің бірі екендігін баса айтқан болатын.

Себебі, жастар – мемлекеттің негізгі күші, ертеңгі жарқын болашақтың кепілі.

“Болам деген баланың бетін қақпа, белін бу” демекші, қазіргі таңда жастарға мемлекет тарапынан қолдау көп. Өз кәсібін дөңгелеткісі келген белсенді жасқа мемлекет тарапынан түрлі несиелер берілуде. Атап айтқанда, 2,5 пайыздық несие арқылы бірқатар жас жеке кәсібін бастап,ауданда кенже қалған бірқатар саланың алға басуына бір кісідей атсалысып жүр. Соның ішінде жылыжай салу арқылы көкөніс түрлерін өсіріп, ауылшаруашылық саласы алға басуда десек артық айтпаймыз.

Одан бөлек, жастарды жұмысқа орналастыру үшін алғашқы жұмыс орны, жастар тәжірбиесі сынды бірқатар жобалар да іске асып отыр. Осылайша, кез келген жас маман жұмысқа орналасып, кәсібінің несібесін көруде.

Сондай-ақ қаржылық сауаттылықты арттыру мақсатында ауданда “Қарызсыз қоғам” жобасы үздіксіз іске асып келеді. Аталмыш жоба арқылы бірқатар жас жеке кәсіп ашар алдында қаржылай сауатты болуы керектігін білді.

Алдағы уақытта да жастарға мемлекет тарапынан үздіксіз қолдау көрсетіліп, олар еліміздің дамуына сүбелі үлес қосады деп ойлаймын.

Айбол ДОЛДАШЕВ,

“AMANAT” партиясы Мақат аудандық филиалының атқарушы хатшысы