Шектеусіз өнер, шексіз мүмкіндік

Атырауда ерекше жандардың шабыт пен сенімге толы шығармашылық әлемі қанат жайып келеді. Өңірлік коммуникациялар алаңында өткен брифингте қоғамдық қор туралы толығырақ мағлұмат алдық.

Атырауда тек өндірістер емес, өр рухты адамдардың дамуына да жағдай бар. Солардың бірі — мүмкіндігі шектеулі болса да, арманы шексіз жандар. Олардың өнерге деген ынтасы, өмірге деген құштарлығы — көпке үлгі. Осындай тұлғаларға арналған «Шектеусіз шығармашылық» жобасы — шын мәнінде, жан мен жүректің үнін тапқан ерекше бастама.
Бұл игі істі жүзеге асырып отырған — «Біз де адамбыз» қоғамдық қоры. Тағдырдың сынағына сынбаған қордың мүшелері азаматтық қоғамның дамуына үлес қосып жүрген мықты жандар. Ал, қордың бастамаларына қолдау білдірген «Теңізшевройл» компаниясы бұл жобаға тек демеуші емес, сенімді серіктеске айналды.
Жоба жетекшісі, қоғам белсендісі Гүлназ Қосмурзиева айтып өткендей, бұл — жай ғана театр емес. Бұл — әр адамның өзін еркін сезінетін кеңістігі, талант пен сенім қатар өсетін шеберхана. Мұнда би де бар, ән де бар, арт-терапия да бар. Ең бастысы — шынайы махаббат пен шексіз сенім бар.
— Бұл жоба көптеген адамның тағдырын өзгертіп жатыр. Біз сахнадан тек рөл емес, өмірлік күш аламыз. Мәселен, ДЦП диагнозы бар қыз бала алғашқыда сахнаға шығуға жүрексінген еді. Қазір ол бүкіл көрерменнің көз алдында басты рөлді сомдап жүр. Оның жүзіндегі қуаныш – сөзбен айтып жеткізгісіз, — дейді Гүлназ Қосмурзиева.
Бүгінде Атырау қаласы мен Жылыой ауданынан 50-ден астам ерекше жан осы жобаның қатысушысы. Оларға 20-дан астам ерікті мен маман қолдау көрсетеді. Бұл — жай ғана шығармашылық емес, бұл — өмір мектебі.
Жоба аясында өткен қойылымдар мен концерттер тек сахналық өнер емес, шынайы өмір көрінісіне айналды. Әр көрермен көз жасын тыя алмай, ерекше жандардың ерік-жігеріне бас иіп қайтады.

«Біз де адамбыз» — жанға жылу сыйлаған атау. Бұл қоғамдық қор 2018 жылы өмірге келген. Қор түрлі әлеуметтік жобаларды жүзеге асырып, ерекше қажеттіліктері бар адамдардың қоғамға араласуына жан-тәнімен еңбек етіп жүр. Театр, қолөнер, психологиялық кеңес беру — бәрі де осы қордың бастамасымен іске асып келеді.
Ал «Теңізшевройл» компаниясының өкілі Хеймиш Полс өз сөзінде былай деді:
— Бұл жоба — біздің жүрегімізге жақын. Ерекше жандардың дарыны мен табандылығына тәнтіміз. Олардың жеңісі — бәріміз үшін жеңіс.
Өнердің тілі — бәріне ортақ. Ал жүрекпен жасалған өнер — ерекше. «Шектеусіз шығармашылық» жобасы — дәл осының дәлелі. Әрбір қатысушының шынайылығы, сахнадағы сенімі, көзіндегі үміті — бізге де үміт сыйлайды. Өйткені олар да адам. Олар да армандай алады. Олар да өнер арқылы өмірді өзгертеді.

Майра ЕРҒАЛИ