ОРКЕСТРДІҢ АУЫЛҒА САПАРЫ

Дина Нұрпейісова атындағы академиялық қазақ халық аспаптар оркестрі Конституция күніне арнап Махамбет ауданының Таңдай ауылы тұрғындарына үлкен концерт берді.
Селолық мәдениет үйінде өткен сауық кеші оркестр орындауындағы Түркештің «Көңіл ашар» күйімен басталды. Одан соң осы араның тумасы, республика Халық әртісі Қаршыға Ахмедияровтың «Алтын ұя», «Күйұран» күйлері орындалды. Оған оркестрдің бас дирижері, ҚР Мәдениет қайраткері Талғат Камалиденов жетекшілік жасаса, Мәдениет қайраткері Рахила Құлсариева оркестр орындауындағы Құрманғазының «Көк ала ат», «Ақсақ киік», Махамбеттің «Жайық асу» шығармаларына дирижерлік етті.

Белгілі әншілер Аманжан Басығариев пен Маржан Төреханова және Қайрат Кәкімовтер Ә.Еспаевтың «Жайық қызы», халық әні «Алқоңыр», Мұхиттың «Кіші Айдайын» орындады. Сондай-ақ, бұл кеште күйші Ерлан Райысов пен әнші Ғарибжан Мұқанғалиевтар да өз өнерлерімен тәнті етті.
Концерт Н.Тілендиевтің белгілі «Махамбет» күй-толғауымен аяқталды.

Т.ЖИДЕЛИН.

Баға берсеңіз
Атырау газеті
Пікір қалдырыңыз