Облыстық қоғамдық кеңестің жаңа құрамы сайланбақ

Бүгінде қоғамдық кеңестер жұмысы Мемлекет басшысы ұсынған «Халық үніне құлақ асатын мемлекет» тұжырымдамасымен үйлесім тауып, олар мемлекет пен қоғамды байланыстырушы көпірдің біріне айналып отыр.  Бүгін облыс әкімдігі ғимаратында облыстық Қоғамдық кеңесті қалыптастыру жөніндегі жұмыс тобының отырысы өтті.

Жұмыс тобының отырысына Арман Хайруллин төрағалық етіп, жүргізіп отырды. Күн тәртібіндегі мәселе бойынша А.Хайруллин Қоғамдық кеңес құрамына сайлау өтетіндігі хабарланғанын, хабарламада белгіленген уақытта жұмыс тобына коммерциялық емес ұйымдар мен азаматтық қоғам өкілдерінен 50 ұсыныс-өтініштер түскендігін баяндады. 

​Қоғамдық кеңес туралы үлгілік ережеге сәйкес жұмыс тобы әрбір кандидатпен әңгімелесу өткізіп,дауыс берді. Әңгімелесу барысында кандидаттардың кәсіпқойлық, жеке қасиеттерін және қоғамдық кеңестер туралы заңнаманы білуін анықтауға бағытталған сұрақтар қойылды. 

​Қорытындысы бойынша жұмыс тобының басшысы Арман Хайруллин ең көп дауыс жинаған 25 кандидаттың Қоғамдық кеңестің құрамына сайланатындығын, жаңа құрамның Атырау облыстық мәслихаты төрағасының бекітуіне ұсынылатындығын жеткізді.

Еркеназ ҚАЛИЖАН

Суреттерді түсірген Ерлан АЛТЫБАЕВ