Мемлекет пен қоғам арасының алтын көпірі

Президент Қасым-Жомарт Тоқаевтың Конституцияның 30 жылдығына орай айтқан мәлімдемесі – құқықтық мемлекеттілікті бекемдеудің және тарихи сана сабақтастығын дәріптеудің айқын көрінісі. Мемлекет басшысы қазіргі Ата заңымыздың маңызын қазақ халқының дәстүрлі құқықтық мәдениетімен байланыста қарастыру арқылы оны тек заңдар жинағы ретінде емес, ел бірлігінің, ұлттық тұтастықтың темірқазығы ретінде таныстырады.

Президенттің «Қазақ – Ұлы дала заңына бас иген, ар-ұяттан аттамаған халық» деген сөзі – ұлттық құқықтық мәдениеттің түп-тамыры тереңде жатқанын және қазіргі Конституция сол дәстүрдің заңды жалғасы екенін дәлелдейді. Бұл – ұлттың құқықтық тарихи жадына деген құрмет әрі заманауи құқықтық мемлекет құру жолындағы ұстанымды қадам.

Сонымен қатар, Тоқаевтың Кеңес кезеңіндегі заңгерлік мектептің рөлін де атап өтуі – посткеңестік құқықтық жүйенің эволюциясын мойындау және оны сындарлы түрде бағалау болып табылады. Осы арқылы Қазақстандағы құқықтық құрылымның үздіксіз даму үдерісі көрсетілген.

Мемлекет басшысының бұл мәлімдемесі, бір жағынан, Ата заңның жоғары тұруы тиіс екенін еске салса, екінші жағынан, құқықтық мемлекет қағидаттарын берік ұстанудың, азаматтардың заң алдындағы теңдігін қамтамасыз етудің стратегиялық маңызын көрсетеді.

Роза ҚОЖАМБЕРГЕНОВА,

”Алтын алқалы” ана