Атырау қаласындағы үш мешіт Қостанайға көмек көрсетуде
Атырау қаласындағы үш мешітте Қостанайға жылу жинау басталды, деп хабарлайды ATPress.kz.
Бұл туралы облыстық Иманғали мешітінің наиб имамы Арман Исаев мәлімдеді.
Арман ИСАЕВ, Иманғали мешітінің наиб имамы:
«Пайғамбарымыз (саллаллаһу аләйһи уә сәлләм) хадистерінің бірінде: «Кімде-кім мүмін бауырының осы дүниедегі бір уайым-қайғыдан құтылуына себепкер болса, Алла Тағала оны қиямет қайымның қайғы-мұңдарының бірінен құтқарады» деген. Қостанайлық бауырларымызға келген қиындықты барша мұсылмандарға болған сынақ деп те қабылдауымыз керек. Өйткені, осындай қиын тұста біздің бір-бірімізге деген бауырмалдығымыз бен жомарттығымыз сыналады. Сол үшін де Атырау облысының жамағаттары бұл жағдайға бей-жай қарамай, қолдан келген көмегін көрсетуге әзір. Қазіргі уақытта ҚМДБ-ның облыстағы өкілдігі басшылығымен «Иманғали», «Қ.Мұңайтпасов» және Дамбы ауылындағы Атырау ауылдық мешітінде сондай-ақ барлық аудандық мешіттерде гуманитарлық көмек жинау басталды. Қосымша сұрақтар бойынша 87025001655 нөміріне қоңырау шалсаңыздар болады».
