“Бала күннің бояуы”: «Күн» инклюзивті театры жаңа қойылымын ұсынды

Admin18.05.2025 17:50

253

Қазақстанда соңғы төрт жылдан бері Мемлекет басшысы Қасым-Жомарт Тоқаевтың тапсырмасымен «Тәуелсіздік ұрпақтары» гранттық жобасы жүзеге асырылып келеді.

Мұндағы басты мақсат – белсенді шығармашыл жастар қауымдастығын қалыптастыру, олардың жаңа және қолданыстағы бастамаларын мемлекет тарапынан қолдау. Гранттық жобаға 14 жастан бастап 35 жасқа дейінгі ел азаматтары қатыса алады. Жоба аясында бес бағыт бойынша 3 млн. теңгеден 30 грант беріледі.

Осы жобаның «Мәдениет» бағыты бойынша жеңімпаз атанған атыраулық Әнел Маратованың айтуынша, 2024 жылы республика бойынша 1284 өтінім түскен. Солардың қатарында Әнел Қайырлықызының бастамасымен Атырау қаласында іске қосылған «Күн» инклюзивті театр жобасын айтуға болады.

Оның мақсаты – 16 жастан асқан, Даун синдромымен туылған балаларды өнер мен театр арқылы қоғамға кіріктіру. Аталмыш театр жобасы жаңа репертуармен 18 мамыр күні Атырау қаласында Ұлы Жеңістің 80 жылдығына орай «Бала күннің бояуы» тақырыбындағы театрландырылған концертін көрермендерге ұсынды. Концерттік бағдарламада балалар қойылым тақырыбымен үндес көріністі, үнді фильмінен үзіндіні сахналап, ретро стильдегі және заманауи үлгідегі билерді орындайды. Сондай-ақ этно мәнердегі сән көрсетілімін ұсынады.

Айрықшалап айтарымыз, «Күн» инклюзивті театр жобасының ерекше актерлері – «Мен бармын!» қоғамдық қорының тәрбиеленушілері. Осылайша, бұл жолы жоба аясында 14 ерекше қажеттілігі бар бала өз өнерін тамашалатуға мүмкіндік алды.

Сондай-ақ театр жетекшісі Әнел Қайырлықызы күн сәулелі балаларды әлеуметтік желілер мен бұқаралық ақпарат құралдарында кеңінен танытып, қоғамда Даун дерті туралы ақпараттық хабарландырулар таратады. Олар TikTok әлеуметтік желісі арқылы да көпшілікке таныла бастаған. Ерекше өрендер санаулы мезгілде миллиондаған қаралым жинап, көрерменнің қошеметі мен ықыласына бөленіп үлгерді.