Конституциялық сабақтастық – тұрақтылық кепілі
Президент Қасым-Жомарт Тоқаевтың Конституцияға қатысты мәлімдемесі – тәуелсіз Қазақстан тарихындағы саяси сабақтастық пен құқықтық тұрақтылықты сақтау ұстанымының нақты айғағы. Шын мәнінде, 2022 жылғы референдум — ел тарихындағы ең ауқымды және мазмұнды реформалардың бірі болды. Конституция баптарының үштен бірінің өзгеруі – бұл жай ғана техникалық түзетулер емес, мемлекеттік басқару жүйесін, азамат пен билік арасындағы қатынасты қайта ойластыру деп айтуға болады.
Президенттің жаңа Конституция жобасын қабылдамай, бұрынғы негізді сақтай отырып реформа жасау жөніндегі шешімі – саяси тұрақтылықты сақтаудың ұтымды жолы. Бұл қадам мемлекеттің сабақтастығын бұзбай, қоғамның өзгеріске деген сұранысына жауап берудің тиімді үлгісі болды. Оның ішінде Әділдік, Ашықтық, Жауапкершілік, Есептілік қағидаттарының Ата заңда нақты бекітілуі – азаматтардың Конституцияға деген сенімін күшейтіп, «халық үніне құлақ асатын мемлекет» тұжырымдамасының нақты жүзеге асуын қамтамасыз етті.
Сондықтан Президент атап өткендей, 30 жылдық мерейтойды жаңартылған Конституциямен қарсы алу – ел дамуының жаңа кезеңіне аяқ басқанымызды білдіреді.
Абдолла ИДРЕСОВ,
«AMANAT» партиясы Атырау облыстық филиалының төрағасы
